Britain parliament amakba dak sendakba nung ano nisung 2 pua lir

LONDON, March 24 (Agencies) : Britain police-i, London parliament amakba maparen dak sendakba nung ano nisung ana pusemogo aser lendong agütsüsang tenüngji Adrian Russell Ajao liasü, ta metetdaktsü.
Britain nung kiralongrar bushiba ketdangser Mark Rowley-i, Bodhbarnü lendong ataloka nisung pungu asüba sülen police-i temulung melemtetba nisung 9 pua ayu, ta ashi.
Police-i, lendong atalokdaktsüsangji Britain nung sor Muslim dangi meyipba nisung, Khalid Masood lir. Pa tenüng aiben melenogo, ta ashi.
“Onoki bushisündangertemi pa kechi tebilemba liasü ibaji angatettsü meranga inyaker,” ta Rowley-i ashi.
“Tang tashi nungbo ano tanga lendong ataloktsü indang kecha tetsübutsü mali. Ajisüaka iba lendong ya pa mulungka agi asü mesüra kiralongrartemi ajungmesoba mesüra kari nungita inyaktsü nungloktsüba ibaji asadanga angatettsüla,” ta pai ashi.
Rowley-i, police-i ano kanga tongtibang nisung ana pua lir. Ka West Midland nungi aser ka linük anüdoklentip tsütsü anüolen nungi apu, ta ashi.
Security tajungba küma tashi itshitsü nüngdaker. Iba nisung ya ozüng alema inyaker tarensen nung liasü aser police-i kanga bushiba nisung lir, ajisüaka pa bail nung chiok. Ibaji kanga aibelen mapa ka liasü.
Onok ket nung nisung 9 pua aliba rongnung tetsür ka densema liasü saka la bail nung chiokogo, ta pai ashi.
Rowley-i, “Iba nisung jagi police ketdangserji metsüngset tsüngda Westminster Bridge nung tetsüng agi jaja aliba nüburtem dak gari agi tsükyonga aodang, ajak agi nisung 50 yirutsü. Item teyirurtem kanga mejungi lir aser kabo tasü taküm tsüngda lir.