Britain speaker-i linük nung aliba India nunger tushi

London, April 24 (Agencies) : Britain Parliament Speaker John Bercow-i linük nung aliba India nunger dang parliament menden atema tokteptsü junger shiogo.
“India nungeri Britain atema tajangzük kanga bentsür arur aser pei takok anguba nung tera yanga akang akanga lia parliament nunga shilem agitsü imlar,” ta John Bercow-i ashiba Asian Lite daily osangkaket ajanga metetdaktsü.
Taoba ita Asian Lite Pranam Awards sentong akadang Britain nung alir India nunger tenet (7) nem iba award agütsüba sülen iba o ya ashi.
Iba sentong nung award angur India nunger par tenentji– economist Lord Meghnad Desai, British-Indian politician Shreela Flather, tesüiba mapang BBC nung saisapong yimozülur Mihir Bose, jenoktsü aruba millionaire akümsang Rami Ranger, Bharatiya Vidhya Bhavan Executive Director Mattur N. Nandakumara, nüburtem temeten atema inyaker aser kaket zülur Zerbanoo Gifford aser Bristol Laboratories nung CEO aser MD T. Ramachandran nunger lir.
Sempet agütsüba sentong ya Bharatiya Vidhya Bhavan nung agi aser sentong nung Britain nung aliba India nunger züngsem tajungtem aser Bob Blackman den Britain MP tem aika dena liasü.