Britain tsür, Susie Wolff-i Formula One toktsütsü

Grove, November 04 (Agencies): Formula One (F1) motorsport tetoktepba nung shilem agiba Williams telok indang gari anishir, Susie Wolff-i tan asayamong tembangba sülen F1 toktepbaren toktsütsü lemtetogo.
Britain tsür, Susie-i küm 4 tashi takok tulu ngua lar Williams telok tenüng nung shilem agiba sülen iba tetoktepbaren toktsütsü lemtetba osangji Williams telokia tanü Bodbar nü jangjashitsüogo.
“Williams teloki F1 toktepba nung shilem agitsü maongka kü nem agütsüba atema pelaba metetdaktsür. Kü nem iba maongka tulu agütsüba ajanga ni ayuba gari toktepa anishitsü mangdang asangsang nung ajangzükogo,” ta Susie-ia metetdaktsü.
2012 küm April ita nungi tenzüka Williams telok nung development driver ama shimokba sülen Susie-i küm 3 tashi bendanga agüja par telok tenzük aser taküm 2015 küm nungi tenzüka Williams telok indang gari toktepa anishitsü jenjang tajung Susie-i ngua liasü.
Lai 2014 British aser German Grand Prix tetoktepba asoshi terenemshiba sentong nung FW36 gari toktepa anishitsü maongka ngua, küm 20 tsüngda nung Grand Prix tetoktepba nung gari toktepa anishir mezüngbuba tetsür gari anishir küma Susie-i otsü tasen yanglu.
Susie ya Mercedes-Benz motorsports nung Executive Director, Toto Wolff kinüngtsü lir.