Britian-i Islamic State telok anema raratsü: David Cameron

Paris, November 23 (Agencies): Britian-i France sülen anidaka, alima teloktep mitkartem den külemi lungjemer Syria nung tentetba kiralongrar telok tetsüti, Islamic State (IS) anema raratsü bilemba olen ka Britain Ato Kilonser, David Cameron-i tanü Hombar nü metetdaktsüogo.
France yimtiba, Paris nung France Tir, Francois Hollande den aroki osangbener den ajurutepdang Cameron-i tanü iba olenji metetdaktsü.
Ano, IS telok anema raratsü nung amshitsü asoshi par linüki Cyprus nung tentetba mitkar airbase amshitsü temelaba France linük nem agütsüba olen ka pai metetdaktsü.
“Ozü parliament senden nung IS telok meshimeshia samatsütsü tasa tan hoptasa benoktsü sentong lir. Tir Hollande-i par mitkartem yoka Syria nung tentetba IS telok anema raraba maparen pusemer aser ozü Britian-ia par linük sülen anidaka, alima teloktep mitkartem den külemi lungjemer IS anema raratsü tebilemba lir,” ta pai ashi.
Paisa ashiba agi, tawa Paris nung nisung 130 shi tepseta lendong atalokdaktsüba ajanga par parliament yimsüsürtemi par mitkartem yoka IS anema raratsü onük agizüktsü imlar.
Cameron-i taoba mapang, 2013 nunga par mitkar tayimtsü yoka Syria Tir, Bashar al-Assad-i aniba mitkartem amaktsü onük parliament nung benok saka par yimsüsürtemi iba onükji magizükba osang jangjaogo.
Ano, Britain aser France na densema, Europe nung tentetba linüktem rong nung IS telok den sentakba miim osangtem lemsateptsü ajungshitsü tebilemba aliba olen ka Cameron-i tanü metetdaktsü.