British actor Albert Finney küm 82 nung süogo

Tsüklai/February 09 (Agencies): 60s mapang British cinema nung tongtibang actor rongnung ka, Albert Finney pa Hokolbarnü arishi küm 82 buba nung alima nungi pilaogo, ta sangdong ka ajanga kinungertemi metetdaktsü.
‘Erin Brockovich’ ‘Murder On The Orient Express’ aser ‘Annie’ film tem nung Albert-i tongti shilem agiba ajaki jangjaa lir. 2011 küm Albert-i pa dak kidney cancer tashidak aliba sangdonga liasü.
Cinema indang original ‘angry young man’ telok nung densema alisang Albert, pai kitchen sink drama film ‘Saturday Night and Sunday Morning’ nung Arthur Seaton shilem agia liasü aser ibaji ajanga pa Oscars pungo atema nominee asü saka pai award ka dang amengutet. 2000 küm pa nem knight jenjang agütsütsü atema temalaba agütsü saka Albert-i aji magizük. Iba dak alaka, Albert ya BAFTA atema 13ben nominee asü koba nung pai award ana tashi agizük. \
1936 küm Salford tesem nung Albert aso aser pa tebo ya kaket yanglur nisung ka liasü. Pa indang headmaster-i ajungshia Royal Academy of Dramatic Art nung Albert azüng aser iba Academy nungi graduating asüba sülen, Royal Shakespeare Company nung pa züngsem ka aküm.
Kasa mapang Albert-i pa indang acting maparen ya theatre nung tenzüka liasü. 1960 küm sayaba Tony Richardson indang film ‘The Entertainer’ nung Laurence Olivier den külemi Albert-i mezüng shilem agiogo. Iba kümjisa, Alan Sillitoe indang film version ‘Saturday Night and Sunday Morning’ koba Karel Reisz-i direct süa liasü iba film nung Albert-i tongti shilem agi.
Albert Finney-isa ‘The Gathering Storm’ nung shilem agia liasü aser iba film atema pai Golden Globe aser BAFTA award nguogo.