British Columbia nung tsüngsem heel talang nokdanger

Ottawa, April 8 (Agencies) : Canada kübok British Columbia province mapa inyakba tesem nung tsüngsem heel talang nokdangogo, ta osangbenertemi metetdaktsü.
British Columbia province sorkari, mapa inyakba tesemtem nung tsüngsem heel talang nokdangbaji kanga junger aser ibaji ajanga yiruyipong nungia kümzüktsü. Tang ano ‘Workers Compensation Act’ kübok aliba tetsüng nung semokbatem indang temzüng ozüng-a yanglushitsü, ta ashiba osangbenertemi metetdaktsü.
“Asen province tesem kar nungbo tetsürtem mapai arudang tsüngsem heel talang aketba asemtsü nüngdaker,” ta province lenir Christy Clark-i ashi.
“British Columbia nunger den sema asen sorkari dena ibaji tai amai bilemer. Anungji onoki iba temzü ozüng yanglushitsü aser yiruyipong atalokdaktsüba sobutsütem mapa inyakba tesem nung asemba nokdangtsü,” ta pai ashi.
Iba tebilemtsü ya Green Party lenir Andrew Weaver-i benokba sülen tenai adok.
“2017 küm British Columbia nung aliba restaurant aser bar tem nung tetsür tsüngsem nung heel talanglang aketba asemtsü tetuyuba agüja alibaji ni mamangteter,” ta Weaver-i osangbenertem dang ashi.
“Tsüngsem nung heel talang aketba semer atem tanüla nung jajatsüji lendong lir. Ano heel talang aketba tsüngsem semer gondha 9 tashi mapa nung nokdangbaji temang asoshi kanga majung aser teberem atema lendong lir,” ta paisa ashi.
Tesüiba mapang restaurant nung inyaker Simran Gill-i, ni inyakba kiburi heel aketba tsüngsem asemtsü tetuyuba agütsüba ajanga mapa nung ibaji semer nokdakba agi tetsüng ajunga apokzüker mapa atemdangbo azü agi yimbanger, ta osangbenertem dang ashi.
Iba amaji tetsüng nung timtem adokba ajanga ita pezü dang inyakerbo lai iba mapaji yutsütsüsa aküm.
“Iba tsüngsem asemba ajanga kü tsüng nung kanga timtem adokdaktsüba agi ni iba mapa meinyaktettsüsa aküm. Iba mapa nung anguba senji tetsüng nung timtem adokba malang liasü,” ta Gill-i ashi.