British Council-i KET awardees nem online membership agutsür

Kohima, March 12 (TYO): British Council-i Kohima Educational Trust 2017 scholarship awardees 184 nem parnok indang online library membership angati agutsütsü; iba online library ajanga premium e-resources agütsür, aser ibaji India tesem mashika nungi angutsü.
Kohima Educational Trust (KET) ya 2003 küm, 1944 nung Kohima tongbang nung rarar British nungeri tentettsü. Iba Trust ajanga shisaliok mapatongtem agi Nagaland yarir.
Iba maparen nung Kohima Educational Society (KES)-i yaritepa inyaker.
British Council aser Kohima Educational Trust partnership küm pongu abensaba mapang ka nung iba maongka sangdongogo. 2017 küm UK-India Year of Culture dak sentakba nung ano maneni sangdong balala agütsütsü.
Alan Gemmell OBE, Director British Council India-i, “UK aser Nagaland tesentakdep taküm alitsü atema onoki tepela nung Kohima Educational Trust nungiter. KET shisashirtemi temaba shisaliok nung iba online library membership ajanga teyari angutsü ta onoki imlar. India aser UK nüburtem ajangzüktsü atema sobaliba, shisaliok aser teka maparen nung asen tesentaktep tashi itdaktsütsü onoki nükjidong lir,” ta ashi.
KES Tir, Charles Chasie-ia, “Ozü shisashirtem atema British Council-i angati online library membership sangdongba atema Kohima Educational Society-i pelar. Item membership ajanga Kohima Educational Trust scholarships nung kanga yaritsü. Taküm parnoki maongka junga mangur kaketshir 184 yaritsü aser UK nungi tangazükba angutsü,” ta metetdaktsü.