British Council-i Nagaland sorkar den tesentaktep linür

Dimapur, October 26 (TYO) : Nagaland Chief Minister TR Zeliang-i United Kingdom sorkar den shisaluyimba, oshi renlokba, kentenba, sobaliba aser tourism asoshi tesentaktep yanglutsü atema olemtepogo.
Bodbarnep Alan Gemmel, OBE, Head of British Council in India-i T.R Zeliang den par kidang ajurutepa senden amendang item onük benoka jembi, ta Media Cell, Chief Minister’s Office, Nagaland-i sangdong ka nung metetdaktsü.
British Council-i kümshia India nungi kaketshirtem UK nung aliba University tem nung azüngtsü atema scholarships 200 den tema teyari agütsür saka North East tesem nungi kaketshirtem aika mali, anungji tarutsü anogotem nung NE kaketshirtemi scholarships agidaktsünür, ta tanep Gemmel-i ashi.
Iba mapang Chief Minister-i Gemmel dang North east tesem nung iba scholarship scheme indnag osang tejangjaba nung metetdaktsü junger ta tebilemba shidanga liasü.
British Council-isa tesayurtem training agütsütsü atema tejangraba lemsatep. Tang parnoki India kübok state 13 nung Teacher Development Programme agir aser Nagaland sorkar den-a iba tesentaktep yanglunür, ta sangdong nungsa shia lir.
2017 küm Year of Euro Culture amungtsü atema linük ana nungi Prime Minister temi telemtetba agia sangdongba nung ajemdaker, British Council-i iba scheme nung Nagaland indang Hornbill Festival dendaktsütsü jangraba metetdaktsü.
Tanep amenba senden nungsa taküm Hornbill Festival anogo tasembuba nung Alan Gemmel-i Tongti Tesemdanger ka ama arua shilem agitsü osang metetdaktsü.
Gemmel-isa Nagaland nung tourism dak sendakba maparen aser Naga nunger sobaliba ajungkettsü tejangraba metetdaktsü.
Senden nung T.R Zeliang-i Nagaland nung Music Academy ka lapoktsü aser idakji lanurtem training agütsütsü atema tebilemba ka shidang.
Iba mapang Music Task Force nung Project Director, G Sema-i ashiba agi, “Naga nunger ya Khristan tem lir, aser onoki Osangtajung Ken aika meteta lir aser staff notations shia lir, saka professional akümtsü atema music tejangjaba nung angazüktsü nüngdaker.”