British MP, Jo Cox kahsetogo

London, June 16 (Agencies): Opposition Labour Party nungi British MP, shiba injang aser kotari agi atsüngba ajanga yiruja liasü, la Brihostibarnü alima nungi pilaogo.
Arishi küm 41 MP, Jo Cox ya la adokba tesem Birstall jila nung nisung kati injang kahlokja liasü.
Batley aser Spen atema Labour MP, Cox yirutsüsang jagi la azü yima toktsür ao. La amaksangjia tera yiru, ta tenük kuli alirtemi ashiba osang BBC ajanga metetdaktsü.
West Yorkshire Police nung tongti constable, Dee Collins-i, la dak akahba kuliji ketdangsertemi memetetdaktsütsü, ajisüaka parnoki nisung ka puogo, ta ashi.
Iba tatalokba atema arishi küm 54 tebur ka Birstall nung aliba Market Street anasa apu, ta  West Yorkshire Police osang ka ajanga metetdaktsü.
Iba osang angashia British Ato kilonser, David Cameron-i, “Jo Cox asüba osang ya tesasatsüka lir. La ya kanga nendaka inyakba Parliament züngsem ka liasü. La kinüngbu aser chirnur ana atema ni sarasademtsür,” ta ashi.
June 23 nü linük nung vote agiteptsü lia Cox-i Britain linük maneni European Union nung alitsü atema nüboyima liasü.