British Muslims-i ISIS nung madentsüla: Abdullah Anas

London, August 30 (Agencies): Taoba mapang Osama bin Laden den külemi inyaksemer kati British Muslim nungertem dang, Syria nung jihad rara atema Islamic State nung madentsüla, kechiyong IS teloki tekolak tangzüka tepsetba aser tashiyim amshia tetsür jenti raksatsübaji Muslim tamangba yimsü anema lir, ta shiogo.
Abdullah Anas ya taoba mapang Jihadist nung lenir tambutiba aser Russia nunger anema Afghan jihad sentong yanglur rongnung ka liasü.
Interview ka agiba mapang Anas-i ‘The Sunday Times’ dang, ISIS ji timtema aliba Syria nung adianutem yaritsü asoshi masü saka parnok nükjidongtem ataloktsü asoshi parnoki rarar, ta aitsüogo.
“Iba jihad ya ozüng alema lir,” ta Anas-i ashi.
Paisa ashiba agi, IS teloki nisung tekolak tangzüka tepsetba aser tetsürtem jenti tashiyim amshia taküm raksatsüba ya khenyongi Muslim tamangba yimsü anema lir.
Quran (Muslim nunger temeshi kaket) ajanga lajartem aser sensakertem dang aria meimba ama tepouktak alirtem dang-a kasa benshitsü sayur, ta paisa ashi.
Pai British Muslim nunger dang, social media nung ISIS-i mesüzükba propaganda nung mangatsüla, “Nenoki parnok (Syria adianutem) meyaritsü,” ta ashi.
Arishi küm 15 pur tetsür densema British Muslim nunger 700 shi ISIS nung adentsü atema Syria aser Iraq nati ogo.
Iba dak alia IS nung adentsü atema bendanger rarartem 30,000 shi Middle East linüktemi ogo, iba nungji Europe densemabo nisung 500 shi asütsü.
Algeria nunger arishi küm 57 Anas ya tang Britain nung alir, aser Middle East nungi meyipa arur mezüngbubaji pa lir.
1984 küm Anas aser Azzam nati Afghanistan-Pakistan arrtsü anasa Peshwar nung Services Bureau tenteta liasü, aser parnoki bendang linük nungi rarartem merirjang aika shimoka liasü.