British nunger Ultra-distance Cyclist Mike Hall süogo

Sydney, April 1 (Agencies): British ultra-distance cyclist Mike Hall Australia nung tetoktepba ka nung shilem agidang gari ka agi tsüka asüba osang sentong ayongertemi metetdaktsü.
Arishi küm 35 tain asayar ya Hokolbarnü Australia yimtiba Canberra tezülen gari kayi atsükba sülen asü. Pa Indian Pacific Wheel Race, Perth nungi Sydney tashi 3,300-mile (5,300 kilometre) cycle arishitepba asaya ka nung shilem agia liasü.
Iba asaya Sydney Opera House nung tempangtsü gondha ishika dang lia sentong ayongertemi pa nem aküm tetushi agüja iba sentong tembangtsü.
Sentong ayongertemi iba dak sendakba ken o nung Police-i bushisüngdangba nung takok tashi yariteptsü ta metetdaktsüogo.
Gari lendong nung gari anisang-i police-i bushisüngdangba nung teka amteper inyakdar.
Iba gari lendong atalokba mapang nung Hall Belgium nunger Kristof Allegaert sülen kicha arishitepba nung tanabuba jenjang nung liasü.
Hall ya Harrogate, North Yorkshire nungi ;lir saka pa Monmouthshire, south Wales nung lia liasü. Pa ya alima nung ultra-distance riders rongnung tajungtiba ka liasü.
Pai taoba mapang nung United States nung Trans Am Bike Race aser Tour Divide Canada nungi Mexico tashi Rocky Mountains ajanga arishitepba nung mezüngbuba jenjang nung takok ngu aliasü.
Pa tenüng nung Deobarnü Sydney nung tenla atema ‘tribute ride’ sentong ka akatsü.