British Parliament kima lendong nung nisung 5 süogo

London, March 23, 2017 : Westminster, London, Britain nung lendong atalokba sülen Parliament züngsemtemi tasürtem nem akhüm agüja minute ka ajemajema nokdakba noksa angur.

London, March 23 (Agencies) : Bodhbarnü Britain yimsüsürtem amenba tiyong kima len kotari amer nisung kati gari ka anir arua London nung aliba Westminster Bridge nung tetsüng agi jaja aliba nüburtem tsükshi yonga aoba sülen Parliament gate nung aliba police ka pai ama aliba kotari jagi oa tsüngset.
Iba lendong nung kotari amsangji dena nisung pungu süogo aser nisung 40 shi yiru.
“Ibai kanga dang shisatsü tamajung agi inyakba kiralongra mapa lir,” ta linük Ato Kilonser Theresa May-i iba tatalokba aitsüogo.
Iba nisung police-i khasetba sülen yimsüsürtem, lord tem, mapa inyakertem aser tesemdangertem kata Parliament aser Big Ben clock tower tesem nungi metugudaktsüi sota ayu. Iba nisungji yangji asü aser apu nung nisung asem asü, ta police ketdangser kati ashi.
Iba lendong nung yirurtem anepalur doctor kati, nisung karbo akhi ama majungtsüsa yirur lir, ta metetdaktsü.
Lendong nung yirurtem rongnungji police ketdangsertem, France nungi school trip aruba lanurtem aika, Romania nungi raliwalir ana aser South Korea nungi linük semdangi arur nisung pungu densema liasü.
Police-i, “Onoki iba mapa ya kiralongraba mapa amai agir aser iba lendong shirnoki agütsüar ano shingaia tenüng magi,” ta ashi.
Metropolitan Police nungi kiralongrar nokdaktsü merangba telen nung tekolakba Mark Rowley-i, “Police-i iba lendong agütsürji nisung kadang ta bilema temulung lema malitsüla” ta ashi.
Pai, iba lendong nung kotari amsang den prangpong ama maliba police ka, aser civilian asem asü aser police asem dena nisung 40 tashi yiru, ta ashi.
Iba lendong ya Islamic teloki inyak südi ta temulung melemi bilemer, ta Rowley-i ashi.
Pai, ketdangsertemi iba nisung jangja lir ajisüaka tang bushisüngdang tesüdak asüba agi temai adoka memetetdaktsür, ta shisem.
UK nung memunui lendong ataloktsü ta jembia aliba mapang iba lendong ya atalok.
Asüng nungi nüburtem agi ama senzüsempongtettsü aser Parliament-a mentettsü, ta May-i ashi.