British PM atema Boris Johnson nübuyim tenzükogo

London, Aami/June 03 (Agencies): Britain ato kilonser ka ama Theresa May melentsü asoshi tokteper ronung Boris Johnson-ia Hombarnü nungi Conservative Party lenir akümtsü mechi nübuyim tenzükogo aser iba mapang pa medemer US Tir Donald Trump-i par linük semdanger.
Nübuyim tenzüka video ka sayaba nung Johnson-i pa nem vote agütsür dang, pa ato kilonser kümra Britain ya October 31 tashinung European Union nungi anizüker aotsü, ta nangzük.
Taoba mapang foreign secretary inyaka alisang ya Tory züngsemtem atema kanga nüngtugu lir, saka par party nungi iba menden asoshi tokteper MP tem ya ana dang akümba sülenang Tory züngsemtemi pa nem vote agütsütettsü.
Par MP tem rongnung pa kangabo nüngtugu masü, kechiyong Brexit atema nübuyimba mapang pai shilem tulu agia lir, aser 2016 küma ato kilonser menden asoshi toktepa mapang tatem tonga metokteptet.
US Tir Trump shibai Hombarnü nungi tenzüka Britain semdanger, pai Deobarnü Johnso busema jembi.
“Ni ibaya kanga junga shisadangogo. Asayar balala ni meteta lir. Saka Boris-i mapa junga inyaktetsü amai ni bilemer. Pa tetemsü asütsü amai bilemer. Ni pa sabur. Aser ni pa teti sabua liasü,” ta Trump-i Sun osangkaket dang ashi aser Johnson dang taoba mapanga tembar, ta ja lir.
Trump-i iba o jembiba ajanga Britain nung alirtemi pa aitsü aser linük yimtenren nung shilem agir, ta aitsü.
Johnson-i pa nübuyimba video sayaba nung kaket shisatsü aser police atema senotsü tali indoktsü busema jembi aser pai linük longjemdaktsütsü, ta ashi.
“Asenoki inyaknüra iba linük nung aliba nüburtem dang shitettsüsa asenok tasü tait alitsüla,” ta pai vote agütsür ka dang kishizüng nung ashi.
Johnson-i mapang talangka nungi ato kilonser mapa inyaknüa liasü saka 2016 küma pa tembar aser külem Brexit campaigner Michael Gove-i Boris bukümba anenba sülen ato kilonser menden asoshi toktepba nungi anen. Iba mapang Michael Gove-i, “Boris-i asen jakdang inyaktsü aliba mapa asoshi lenir ka ama meinyaktettsü aser meyangertettsü,” ta shia liasü.
Tang pai ato kilonser menden asoshi toktepba maparen tenzükba nunga tera meshidaki tenzük, kechiaser Brexit referendum campaign mapang pai metetsümonga tiazü jembi ta tai tonglokja aliba jembitsü asoshi taoba hopta pa okadaki jaoka liasü.
Iba ken o ya Britain-i hopta ka nung European Union nem sen pound million 350 (USD 440 million) yoker, ta Johnson-i ashiba indang lir.
Ato Kilonser Theresa May-i Brexit ken o takok mongutetba sülen menden toktsütsü ta sangdong aser iba sülen la melentsü asoshi tokteper nübu 13 kümogo, kong MP timbai Gove, Johnson aser foreign minister Jeremy Hunt nungertem busemer.