British Police-i London Tube nung bomb pokdaktsür ka apu

London, September 16 (Agencies): London Underground train nung bomb pokdaktsür ka Honibarnü Channel port nung apu ta British police-i metetdaktsü.
“Arishi 18 tain ka Kent Police-i tanep Dover nung apu. Paji Terrorism Act nung Arrla 41 kübok puogo” ta police-i ashi.
“Iba dak sendakba nung bushisüngdang junga agidar saka onoki maneni bushisüngdangtsü aser lendong ataloktsü jenjangji temaba nungdang lir” ta Senior National Co-ordinator for Counter Terrorism Policing, Neil Basu-i osangbener dang ashi.
Hokolbarnep London Underground train nung bomb ka apokba nung nisung 30 tashi yirua mozükidang anepaludar.
Prime Minister Theresa May-i Britain nung security jenjangji “critical” ta sangdongogo aser ibaji ano amaktsü akok ta asüba tangatetba nung lir. Tongtipang tesem aika nung sepaitem aser armed police mapa lemzüktsüogo.
Honibarnü Britain-i nuclear power plants aser ministry of defence tesemtem nung sepai noklang aika mapa lemzüktsüogo.
Taoba mapang Britain nung “critical” ta sangdongbaji Ariana Grande kenten senteong nung nisung 22 tepsetba sülen sangdonga liasü. Iba lendong ya taküm May ita Manchester nung atalok.
Taküm Britain nung kiralongra mapa inyakbatem atema ISIS-i tenüng agia sangdongogo. London nung lendong ana aser Manchester nung kenten sentong amakbatem atema parnoki tenüng agiogo.
Yashi atalokba lendong atema ISIS-i parnok indang news agency Amaq nung tenüng agia sangdongogo saka iba atema parnoki kuli kecha magütsü.
Western intelligence ketdangsertemi ashiba agi, ISIS tesayuba ajanga amakertem kar ajungmesor alitsü akok saka parnoki item tasa atonga inyak ta asüba kuli tejangja mali.