BRO-i Arunachal nung lenmang yanglu

Itanagar, September 4 (Agencies): Arunachal Pradesh nung China arrtsülen Upper Subansiri district nung Border Roads Organization (BRO) puri km-71 talang lenmang ka yangluogo aser iba ajanga iba tesem nung aliba yimtsüng aika ajangzüktsü.
BRO pur project Arunank ya August 31 nü lapokogo. Km 71.30 talang lenmang yagi Sarli aser Huri na sendaktepdaktsür aser iba ajanga Pipa, Damin, Huri aser tanga yimtsüng nung aliba nüburtem ajangzükdaktsütsü. Maneni iba lenmang ajanga new Huri Taliha lenmang yangluba nung teyari agütsütsü aser ano yimtsüng aika sendaktepdaktsütsü koba ajanga state terenlok nung yaritsü.
BRO sangdong ka ajanga ashiba agi, iba lenmang ya 2006 küm May ita yanglu tenzük.
Iba tesem ya kanga tezülen lir anungji lenmang yanglutsüba atema machine balala ajak Air Force helicopter ajanga Lower Subansiri district kübok Ziro tesem nungi belener ao.
Machine tem ajak atongsar helicopter ajanga belener ao aser iba tesem atongba sülen tanaben atongtepa maparen balala inyak tenzük.
Taoba küm lenmang tekeratiba nung yanglutsü atema April ita dozers talila asem atongsar bener oa lenmang km 44 buba nung atongteba mapa inyak tenzük. Iba ajanga küm ka nung lenmang km-10 tutetogo koba tajangtetba tuluka lir.
Project Arunank nung inyakertem state terenlok aser national security atema longren longbang nung tsüngsang mongpu kecha shiteta maliba kinük tesemtem nung kanga meranga inyakogo, ta kasa sangdong ajanga metetdaktsü.