BRO-i Phesama anentsüh okdoktsü atema kanga meranga inyaker

Kohima, August 26 (TYO) : Phesama yimdak NH-29 nung anentsüh alua alibaji anogo ana-asem ka tsüngda okdoktsü, ta Border Roads Organization (BRO)-i tanü metetdaktsü.

Iba mapa inyakba nung land excavators 2, track dozer 1 aser wheel loader 1 den mapa inyaker nisung 40-50 shi lir, ta Bodbarnü Project Sewak, BRTF aser BRO ketdangsertemi osangbener den sensaksemdang ashi.

Parnoki North East nung land excavators tulutiba amshir aser parnok indang nükjidong tongtipangbaji anogo ishika tsüngda lenmang lapoktsü atema lir ta BRO-i ashi.

Phesama nung lennirtemi ashiba agi taküm anentsüh ajanga kilen 46 nungi nisung 250 shi timtemer.

1962, 1990 aser 2013 nunga iba kasa tesem nung anentsüh alu saka taküm tamajungba lir, ta parnokisa ashi.

St. Jospeh’s College Jakhama, St. Paul School Phesama, Japfü Christian, Southern Angami yimertemi senzüsenbongertem khu benja yariteper, ta Phesama yimertemisa ashi.

Iba dak sendakba nung Nagaland Commissioner & Secretary to the Department of Works & Housing, Himato Zhimomi-i Phesema nung anentsüh aluba ajanga National Highway-29 shibanga atar aser Chakhabama-Kidima-Viswema-Mao road len gari tilatem senzütsü akok ta sangdong ka ajanga metetdaktsüogo.

Dimapur nung len tom nung anendaka aliba gari tulutem Inter State Truck Terminus facility, 7 Mile-Chumukedima nung anentsü mepishir, ta Zhimomi-isa metetdaktsü.