Bru nunger refugee tem anir arutsü anogo atsülangshir

Aizawl/Agartala, Luroi/August 13 (Agencies): North Tripura district, Kanchanpur sub-division kübok relief camp trok nung jenoka aliba Bru nunger refugee tem Mizoram-i anir arutsüba sentong ya Luroi/Aug 25 nü nungia tenzüktsü, ta Mizoram Home Department ketdangsertemi Amungnü metetdaktsogo.
Mizoram Home Department sangdong ka ajanga ashiba agi, relief camp tem kar nung refugee tem renema maliba ajanga parnok anir arutsüba sentong ya atsülangtsüsa aküm.
Parnok ya Luroi/Aug 14 nü nungi tenzüka anir arutsü sentong liasü.
Kasa mapang nung Union Ministry of Home Affairs-i, tawa kümtetba refugee lokti Mizoram Bru Displaced Coordination Committee (MBDCC) puri iba sentong mejangjungdaktsütsü asoshi jenjang tapet agiogo.
Special Secretary, MHA’s internal secretary wing Rina Mitra lenisüba kübok telok kati, tensa asadangtsü Kanchanpur sub-division semdangogo.
Parnoki Rogonü Kanchanpur sub-division, Damcherrra RD Block’s conference hall nung tensa kanga junga asadangtsü asoshi senden ka ayonga menogo.
Iba senden nung North Tripura district District Magistrate aser Superintendent of Police aser Aizawl nungi senior secretary level official tem dena liasü.
MHA aser State sorkar ketdangsertemi iba sentong dak sendakba nung osang tejangja kecha magütsüaka osang ka ajanga ashiba agi, Central sorkari Bru nunger refugee tem meyipa aruba sentong kechi südir süaka taruba itabo tenzükner.
Osang ajanga angazükba agi, state anaprongla nung ketdangsertem dang tenüngdakba maparentem ajak inyaka aotsü asoshi tetuyuba agütsüogo, aji asünungdang iba sentong ya takok ngua inyaktettsü.