Bru nunger refugee temi Ashapara nung longkak ait

Dharmanagar, Mongputeni/October 8 (Agencies): Sorkari bendanga agüja minyakba ajanga Bru refugee tem Mizorami meyipa aotsüba sentong nung maneni tetsükdaktsü adokogo.
Refugee temi pei limai meyipa aotsü muemulungi Kanchanpur sub division kübok Ashapara tesem nung longkak aita liasü.
Ketdangsertemi longkak aittsü sentong yanglur aliba indang jangjaa meteta liaka Bru nungertem Mizoram-i takok ngua meyipa anir aotsü asoshi jenjang tapet magi.
Tang atemzüker inyaka aliba maparen kübok refugee tem Naisinghpara camp nungi Mizorami meyipa aotsü asoshi sentong yanglur liasü.
Ajisüaka refugee temi Ashapara nung wako tanak amer longkak ait aser Mizoram-i meyipa aotsü aliba pur tem bus telungi meyoki sota ayu.
Parnoki ashiba agi, parnok takhangba ataloktsüba sülenang parnok Mizoram-i meyipa aotsü.
Bru refugee tem takhangbatem rongnung item onük tem densema lir:
Parnok anenzüktsüba tesem asadangshitsü aser item tesemtem ya yimtsüng tasen kümdaktsütsüla.
Bru nunger tem nem Mamith, Kolashib aser Lunglei kübok parnoki mulungba tesem nung alitsü shimdaktsütsüla.
2009 küm Mizoram-i meyipa aortem nem kasa teyari agütsütsüla.
Mizoram indang EPIC maliba ajanga züngtoker alirtem tanaben asadangshitsü.
Parnok lidaktsütsü mesemteter aliba tesem, Mizoram sorkar, camp nung lenirtem aser kibong shia nungi tekolakbai tsüngdong oa asadangshitsü.
Mizoram-i meyipa mao tsüngda ki yanglutsü asoshi senotsü teyari agüjatoktsüla.
Khen atema senotsü teyari agütsüba kibong nung tekolakba indang bank account nung inoktsütsüla.
Bru nunger kibongtem kümzüka ayutsü atema CAPF yoktsü aser Tripura nung ama Bru nunger lanurtem shilem 70 agi kümtetba SPO ka tentettsü.
Bru nunger tem atema Indian Constitution, 6th Schedule kübok article number 244 (2) aser 275(1) nung ajemdaker autonomous district council ka tentettsütsüla.
Item takhangba tem bener Bru nunger refugee temi longkak aita liasü.