Bru nungeri Tripura toktsür aoer; Kibong 21 ogo

Agartala, Rongjui (September) 19 (Agencies): Bodbar nungi Bru refugee tem Tripura nungi Mizoram-i aruba mapa tenzükogo. Tanü kibong 21 nungi züngsem 110-i Mizoram kübom Mamith district-i apusoa ogo.
Shitakba agibo tanü kibong 27 meyipa aotsüba liasü saka parnok kibong 21 dang aru. Parnok Mamith district nung anenzüktsü aser Brihostibarnü Lunglei district-i apusoa aotsü.
North DM Rabel Hamendra Kumar, North SP Bhanupada Chakraborty aser tanga ketdangsertem lia iba mapa inyak.
July 3 nü Tripura aser Mizoram state sorkartem, Centre sorkar aser Mizoram Displaced Peoples forum teloktem tsüngda Bru refugee tem meyipa aotsü atema tenangzüktep agiba sülen tanü mezüngbuba mapa tenzükogo.
Reang kin nungeri parnok sasa ‘Bru’ ta ajar aser parnok October 15, 1997 nungi Tripura kübok refugee camp balala nung liyonga arur.
Mizo forest ketdangser ka tepsetba ajanga tensa mejungi aküm aser iba jagi parnoki Mizoram toktsür jena aru.
Osang ajanga ashiba agi, Bru nunger kibong 5,407 shi lir aser iba nung züngsem ajak agi 32,876 lir.
Tripura kübok Mizoram den arrtsüa aliba Kanchanpur aser Panisagar sub-division tem nung parnok jenok.