Bru refugee tem nem March 31 tashi relief agütsütsü

Agartala, Aenjeti/January 16 (Agencies): Tripura kübok relief camps trok nung Mizoram nungi Bru refugees tem shirnok küm 21 dak tema jenoka lir, parnok Central Government-i chiyongtsü aser tanga relief osettem ano ita ana ser tesadang agütsütsü atsülangtsüogo.
Kanchanpur Sub-Divisional Magistrate Abeda Nanda Baidya-i ashiba agi, Union Home Ministry-i tribal refugee tem Tripura nungi Mizoram-i aotsüba anogo March 31 tashi atsülangtsüogo aser iba mapang tashi relief osettem agütsütsü.
Baidya-isa, refugee temi mepishiba sülen Central Government-i angati agi ration aser relief material tem taoba küm October 22 nungi agütsü tenzük aser ibaji Bodhbarnü tembangogo, ta ashi.
Taoba küm July ita telok pezü tsüngda senden nung chiyongtsü aser tanga relief osettem October 1 nü nungi magütsütsü ta lemteta liasü. Iba telemtetba ya refugee tem Mizoram-i meyipa odaktsütsü nükjidong nung agi.
Mizo forest ketdangser ka Mizoram nung tepsetba sülen kin ana tsüngda mangatettep adok aser iba sülen Bru nunger parnok kibong 5,907 nungi nütsüng 35,000 Mizoram toktsür northern Tripura-i jena ao kong parnok Kanchanpur aser Panisagar sub-divisions kübok relief camp tenet tashi nung 1997 küm October ita nung lidar.
Kasa mapang nung Mizoram Bru Displaced People’s Forum (MBDPF) puri Ato Kilonser Narendra Modi, Union Home Minister Rajnath Singh, Home Secretary Rajiv Gauba aser Joint Secretary (North-East) Satyendra Garg dang parnok Mizoram-i meyipa mao tashi relief oset balala agüja atatsü mepishia asüngdangogo.