Bru refugee temi Mizoram-i aotsü memulunger

Agartala/Aizawl, June 8 (Agencies) : Mizoram nung kin o kin rara adokba agi lisopurtemi state toktsür Tripura nung jenokba sülen küm 18 ajunger aser parnok tanaben kidangi meyipa arutsü atema inyakyim balala ajanga merangdanga arur saka ka danga takok monguteti lir.

“Center aser Tripura sorkartemi shiyonga aruba sülen Mizoram sorkari taküm June 8 nungi tribal refugee tem shilem lemsar anir aotsü telemtetba agi.Iba ya meinyakdang Mizoram sorkari June 2 nungi sensopurtem metettsü atema identification camp ka ayongzük, saka iba nung nisung shingaia shilem magi” ta Panisagar Sub-Divisional Magistrate, Biplab Das-i osangbener dang ashi.

Reang lisopurtemdang “Bru” ta ajar aser parnok October 1997 nungi Tripura anüdoklentip tsütsü jenoker liyonga arur. Mizoram anüolen tsütsü Mizo forest officer ka tepsetba sülen kin o king azütokshitep tenzükba agi parnok Mizoram toktsür Tripura nung jenok.

Deobarnü Kanchanpur nung North Tripura District Magistrate & Collector, Santirai Riyan-I refugee lennirtem den ajurutepa parnok Mizoram nung pei pei talidaki meyipa aotsü ayongzük. (Maneni tapak 10 nung..)