Bruce Springsteen-i autobiography, ‘Born to Run’ sayatsü

Los Angeles, February 12 (Agencies): Rock kentener mongin, Bruce Springsteen-i pasasa pa züluba taküm otsü kaket taküm 2016 küm sayatsü renemba osang ka sangoktsüogo.
Arishi küm 66 tain Springsteen-i pa taküm nung ajurushiba tatalokbatem indang züluba kaketji Simon & Schuster ajanga taküm September ita 27 nü sayatsütsü sentong renema lir.
Springsteen-i 2009 küm Super Bowl football sentong nung kentena shilem agiba sülen ‘Born To Run’ ta ajaba kaketji zülutsü tenzük.
New Jersey kübok Freehold nung pa tanur asüdang nungi tenzüka Asbury Park aser tesülen, E Street Band telok tenteta alima ajunga nung nüngtugu kentener akümba mapang tashi ajurushiba tatalokbatem taküm otsü kaket nungji zülusema aliba osang jangjaogo.
“Peisasa pei taküm otsü kaket zülutsüji komaka dang lir. Ajisüaka, ni alima den kü shisatsü ajunga lemsateptsü nükjidong nung tan kaketji züluogo,” ta Springsteen-ia metetdaktsü.