Brunei, Thailand semdangtsü Ansari apusoa ogo

New Delhi, February 01 (Agencies): Linük tatong Tir Hamid Ansari-i Brunei aser Thailand na anogo pongunü semdangtsü atema tanü New Delhi nungi apusoa ogo.

Tesüiba küm 50 tsüngda tang mezüng India tatong Tir kati Thailand semdanger aser tang mezüng Brunei linük semdanger asütsü.

February 1 nungi 3 tashi pai Brunei semdangtsü aser Brunei Sultan, Hassanal Bolkiah ajurua senden amentsü.

“Brunei ya India aser Asean (Association of Southeast Asian Nations) atema tongtibang partner ka kümogo,” ta External Affairs Ministry, secretary (east), Anil Wadhwa-i sangdong ka ajanga ashi.

“2013 nungi 2015 küm tashi nung Brunei-i India-Asean coordinator ama tongtibang shilem agiogo,” ta paisa shisem

Jammu and Kashmir onük nung Burnie-i India tangatetba pusemer aser UN Security Council nung India permanent züngsem akumtsü atema-a parnoki nungiter.

India aser Brunei na tsüngda shishilembabaji US sen billion 1 lir, aser item sen timbaka totzü tazü nung shishilembaba lir.

“Asenoki Burnie dang nung totzü nungi adokba product tem den külemi organic chemicals, metal ores aser scraps densema nüngdakba tanga osettem agir,” ta pai ashi.

“Asenokia Brunei dangi tongtibangsüa transportation oset, shi/shi products aser sentilung den sentiosettem yoker,” ta paisa ashi.

Ansari-i iba linük semdangba mapang civil aviation, space, shishilembaba, ICT aser hydrocarbons onüktem benoka jembitsü, iba den külemi anema-alibaren aser defence nung amaliteptsü atema tezüngzüktep agitsü imlar, ta Wadhwa-i ashi.

Ansari-i yangji alir India nungertem dena jembitsü. Burnie nung India nunger 10,000 shi lir, aser parnok timbaka doctor aser tesayur tem lir, ta paisa ashi.

Iba sülen Ansari-i February 3 nungi 5 nü tashi Thailand semdangtsü. Tamalen Thailand semdangtsü atema Thai Ato kilonser Prayut Chan-o-cha-i India ketdangser jaoka liasü.

Pai Ato kilonser ajuruba dak alia Sanskrit shisashir, Princess Maha Chakri Sirindhorn-a ajurutsü.

Thailand yimtiba, Bangkok nung aliba Chulalongkorn University nung Ansari-i India nunger Look East aser Act East policy onük jembitsü aser yangji alir India nunger dena jembitsü.

Tang India aser Thailand na tsüngda shishilembabaji US sen billion 8.66 shi lir.

Ansari-isa notheren Thailand nung Chiang Mai yimti semdangtsü.