Brussels Airport: Lendong atalokba sülen tayimtsü senzütsü tenzüker

Belgium yimtiba, Brussels nung tentetba tayimtsü anendak nungi nübur aniba tayimtsü kati Portugal nung tentetba Faro yimti bushia nübur anir aodang agiba noksa ka yangi angur. Kiralongrartemi hopta ana tejaklen lendong atalokdaktsüba sülen tayimtsü 3 tashi Brussels tayimtsü anendak tanü toktsüba osang jangjaogo. (Brussels, April 03)

Brussels, April 03 (Agencies): Piesasa pokseta asütsü mulungtetertemi hopta ana tejaklen bomb lendong atalokdaktsüba sülen Belgium yimtiba, Brussels nung tentetba tayimtsü anendak nungi tayimtsütem tanü, Deobar nü nungi senzü tenzükogo.
Brussels nung tentetba tayimtsü anendak aser anasa tentetba metro station na nung pokshiba lendong atalokba ajanga ishiba agi nisung 32 tashi asüba aser tayimtsü anendak tentetba departure tesema poksaba osang jangjaogo.
Brussels Airlines-i ketdang asüba nübur aniba tayimtsü kati Portugal nung tentetba Faro yimti bushia aoba densema, tayimtsü 3-i Brussels tayimtsü anendak tanü tokja liasü.
Lendong atalokba jakdangbo anogo shia tayimtsü 600 shi Brussels tayimtsü anendak toktsür alima tesem balalai oa liasü.
“Lendong ataloker mapang talangba mesüidang nübur anir senzüba tayimtsütem tanaben senzütsü tenzükba ajanga onoki lendong ajuruaka, temulungtetba tulu yur pei mapa takok ngua inyakba kuli sayur,” ta Brussels Airport Company nung Chief Executive Officer (CEO), Arnaud Feist-i metetdaktsü.
Ano külen, Brussels nung right-wing yimtenren telok aser kin dak ajemdaker nüburtem bendanga benshiba maparen anemer lanurtem na tsüngda raratep adokba sülen police-i nisung ishika apuba osanga jangjaogo.
Tanü longkak aiter nisung 150 dak temai rarateptsü tenzükba sülen police-i tzü kaloktsüba sülen ang longkak aita raratepertemi songtemteta liasü.