Brussels amaker rongnung ka teno 2016 Rio Olympics nung shilem agitsü

Brussels, May 21 (Agencies) : Tawa taküm bendanga agüja Brussels tayimtsü anenba tesem amaker rongnung ka teno, Mourad Laachraoui-i European Taekwondo Championships asayamong nung gold medal angu aser tang pa Belgium nungi Brazil nung oa Olympic Games nung shilem agitsü renema lir.
Pa tedi, arishi küm 24 tain, Najim ya March 22, 2016 nü Belgium yimtiba aser linük nung yimti tulutiba Brussels tayimtsü anenba tesem amakdang taküm bendanga agütsür tapoktsü poklokja asür rongnung ka liasü. Iba amakba mapang aser ano yimti nung metro jajaba tesem nung taküm bendanga agütsür tapoktsü pokdaktsüba lendong nung ajak agi nisung 32 tashi asü.
Arishi küm 21 tain, Mourad-a Rio De Janeiro nung August 5, 2016 nü nungi tenzüka asayatsü aliba Olympic atema Belgium nungi shimteter nisung 185 rongnung densema lir aser pai Under-58kg tarensen nung shilem agitsü.
Pai Montreux, Switzerland nung Hokolbarnü Under-54kg tarensen nung gold medal angu aser ibaji ajanga Flemish taekwondo federation-i twitter ajanga pa nem “Europe`s king of the lightweights” ta tenüng agütsüogo.
Mourad-i, “Kü adianu, Najim ji kanga dang nisung tajung aser tanur asüdang nungi kanga techira liasü. Pai shinga anemba-a onoki melazük ajisüaka 2013 küm pa Syria-i aoba sülen pai kinungertem den tesentaktep kecha mayu,” ta Brussels tayimtsü anenba maker tananü osangbenertem den jembidang ashi.
Islam atema taküm bendanga agütsüsang electromechanics nung mongin, Najim ya yaküm November ita nisung 130 asüba lendong, Paris amakba mapang tapoktsü yanglutsüsang lir ta temulung melemi bilemer.
“Ya kanga tebangkatsüka lir-tsürabur kasai anitetba adianu rongnung ka kanga majung aser kabo kanga tajung aküm,” ta March ita nung okatsür Philippe Culot-i ashi.
“Ner kibongji nai shimer masü,” ta Mourad-ia ashi.