Brussels nung bomb lendong atalokdaktsür jangjaogo

Paris, April 22 (Agencies): Brussels nung bomb lendong atalokdaktsür rong nung ka, Najim Laachraoui Islamic State (IS) kiralongrar teloki tashiyim agi apuba bendangertem ayudak tanüker ka aliba osang bushitetogo.

IS-i taoba mapang tashiyim agi pua ayur France senso ishikati Laachraoui indang osang jangjashitsüba osang angazükogo.

Angazükba agi, IS teloki Syria nungi tashiyim agi apuba sülen France nunger osangbener 4 tashi 2013-2014 tashi tashiyim agi pua ayu aser parnok anüker, ‘Abou Idriss’ aser Laachraoui na kasa nisung aliba kuli agüja liasü.

“IS ket nungi kümzüka aniteter osangbener rong nung densemer, Nicolas Hennin-i Abou Idriss aser Najim Laachraoui na kasa nisung aliba kuli agütsüogo,” ta par okatsür, Marie-Laure Ingouf-ia osang jangjashitsü.

IS telok nung züngsemtsü nükjidong nung Laachraoui-i 2013 küm February ita Syria-i aoba osang bushitetba olen ka Belgium prosecutor-temia metetdaktsüogo.

Belgium yimtiba, Brussels nung tentetba tayimtsü anendak taoba March ita 22 nü bomb lendong atalokdaktsür rong nung arishi küm 24 tain Laachraoui-a densema aliba osang bushiteta lir.

France kübok Paris nung yaküm, 2015 küm November ita atalokdaktsüba lendong nunga Laachraoui-i shilem agiba kuli ngua lir.