Brussels nung rongdak NATO senden ka amen

Brussels, November 24 (Agencies): Turkey-i ayongba sülen Belgium yimtiba, Brussels nung rongdak North Atlantic Treat Organization (NATO) ambassadors senden ka tanü Mongolbar nü menogo.

Par mitkar tayimtsütemi Syria arrtsülen, Turkey lushi temalen ayimgba Russia tayimtsü 1 tanü anüng tom nungi kazüka yokba sülen Turkey-i NATO sendenji jatepba osang jangjaogo.

“Turkey-i ayongba sülen North Atlantic Council (NAC) senden ka jatepogo. Turkey-i par lushi telung nung Russia tayimtsü ka anüng tom nungi kazüka yokba osang metetdaktsütsü nükjidong nung NAC senden jatepba osang angazükogo,” ta NATO ketdangser kati metetdaktsü.

“Tekümdangtsü osang aiben lemsatepaka, Russia’er Su-24 tayimtsü kati Syria arrtsülen nungi Turkey lushi telungi minute 5 tsüngda nung 10 ben tashi aitba yong ozü F16 fighter tayimtsü 2-i Russia’er tayimtsüji anüng nungi kazüka yok,” ta Ankara-ia metetdaktsüogo.

NATO nung züngsemba linük 28 nungi ambassador-tem züngsemba NAC-i mapang shia ajurutepa senden amener saka NATO nung züngsemba linük kati danga lendong ajurura, iba linük kümzüktsü nükjidong nung NAC-i rongdak sendena amentsü tashi bena lir.

Ano külen, tanü anüng tom nungi kazüka yokba tayimtsü anir pilot 2 rong nung 1 Syria sorkar anemertemi tepsetba aser tanabuba pilot samar tang bushiba osanga jangjaogo.

“Ozü mitkar tayimtsü anati Russia tayimtsüji Syria arrtsülen, Turkey nung tentetba Hatay province kübok Yayladagi district temalen anüng tom nungi tanü kazüka yoka liasü,” ta Turkey mitkar lenirtemia osang jangjashitsü.

Russia-ia par tayimtsü anüng tom nungi kazüka yokba osang jangjashitsü saka iba tayimtsüji Turkey’er tayimtsütemi masü saka ali nung alirtemi anüng tom nungi kazüka yokba osang ka metetdaktsüogo.

“Ali nung alirtemi ozü Su-24 tayimtsü ka anüng tom nungi kazüka yokba sülen iba tayimtsüji Syrian Arab Republic nung tsükokba osang jangjaogo. Turkey-i ozü tayimtsü kazüka yokba ajanga par linüki kanga dang aibelenogo,” ta Kremlin otongdar, Dmitry Peskov-ia tanü metetdaktsü.