BSF aser Pakistan Rangers senden amen

New Delhi, July 17 (Agencies): India-Pakistan arrtsülen ceasefire ozüng alema injang aser mortar shells yoktepba mapang ka nung Hombarnü Jammu & Kashmir, Samba sector kübok International arrtsü nung India nunger Border Security Force (BSF) aser Pakistan Rangers na tsüngda senden menogo.
Linük anaprong tsütsü nungi commander temi arrtsülen ceasefire alema inyakba dak sendakba onüktem nung o lemtepa liasü.
Border Security Force (BSF) aser Pakistan Rangers natisa field commanders tsüngda taliba amalitepa inyaktsü aser mangatettep tilateri bentettsü atema bangjem.
BSF aser Rangers napronglai International Arrtsü nung yimjung alitsü atema inyaktsü bangjema liasü.
Ano tanga osang ka nung India-i Pakistan dang, arrtsülen ceasefire alema inyakba atema onoki meyiptsütsü onok dak temeten lir, ta metetdaktsü.
Hombarnü Army tongti kati Pakistan dang, Jammu & Kashmir kübok LoC nung ceasefire alema inyakba atema India-i meyiptsütsü temeten lir, ta ashi.
Telephone ajanga director general of military operations (DGMO), Lt Gen A.K. Bhatt-i Pakistan nunger commander, Maj Gen Sahir Shamshad Mirza dang, Indian Army temi LoC nung yimjung alitsü atema inyaker, ta ashi.
Pakistan nunger army temi Poonch aser Rajouri districts kübok LoC nung mortar shells yokba ajanga Indian Army ka den arishi küm 9 tetsür ka asüba sülen ghonda asem tsüngda army ketdangseri Pakistan ketdangser den jembi.
Army ketdangser ana tsüngda minute 10 shi jembi.
Lt Gen A.K. Bhatt-isa Pakistan army commander dang, India nunger sepaitemibo arrtsü alema aittsü merangertem dak dak injang khaloktsür, ta ashi.
Indian Army-i ashiba agi, taküm küm June ita nung Pakistan sepaitemi ceasefire ozüng alema 23 ben inyakogo, BAT (Border Action Team)-i khen amak aser Pakistan-i anaben tashi arrtsü alema aittsü merangogo.