BSF-i Pathankot anasa Pak-India arrtsü nung nisung ka kahset

Pathankot/Amritsar, January 21 (Agencies): Brishostibar anepdang Border Security Force (BSF) sepaitemi Pathankot anasa India-Pakistan arrtsülen nungi India telungi aittsü meranger nisung asem rongnung ka kahsetogo.

Par asem jagi Pathankot sector kübok Tash Lassian tesem nungi India telungi aittsü meranga liasü.

TOI osangbenertem den jembidang BSF Inspector General, Frontier, Anil Paliwal-i, tanep 6:40 ako meta Pakistan nungi nisung asemi International arrtsü adena aittsü merang, saka BSF patrolling party-i parnokji anguba sülen parnoki sepaitem dak injang kahloktsü.

“Ozü sepaitemia meyipa injang kahloktsü aser par asem rongnung ka kahset aser ana Pakistan leni meyipa jena ao. Tesülen nisung ka tasümangji International arrtsü aser arrtsü atsü tsüngda angu,” ta ketdangserisa ashi.

Palwal-isa, mepet-tzüsü aliba maongka agia parnoki India telungi aittsü merang saka BSF sepaitemi parnok nokdangtet, ta ashi.

Hopta ana tejaklen Pakistan nungi kiralongrar trok India telungi aita Punjab nung Pathankot Air Force base amakba sülen tanü iba ya atalokogo.