BSF-i Rohingyas nunger meita alitsü metetdaktsü

Agartala, October 18 (Agencies): Border Security Force (BSF) puri Tripura nung Indo-Bangla international arrtsü len nungi Rohingyas nunger linüki senoka maitdaktsüi nokdangtsü asoshi kümdanga alitsü metetdaktsüogo. Tripura nung Indo-Bangla arrtsü km 856 lir.
“Rohingya nunger linüki senoka aitsü ta amokmerena bilemba ken o ya mesendoktsüla, kechiyong taoba mapang nunga kasa lokti ya arrtsü adena senzüsenpongba ngua aruogo. Rohingyas nunger aika tang Bangladesh nung atsükoka lir.
Anungji onoki Tripura nung arrtsü anükertem dang kümdangshia alitsü asoshi metetdaktsüogo,” ta BSF IG (Tripura Frontier), S R Ojha-i yashi nikongtsütsü osangbenertem dang ashi.
Myanmar kübok Rakhine province nung mepetmesü adokba sülenbo tang tashi nung Rohingya nunger ka danga Tripura-i aita mali, ta IG-isa ashi.
Paisa osangbenertem dang ashiba agi, Tripura Frontier BSF puri October 22 nü arrtsü anükdang linük asoshi pei taküm bendanga agütsür BSF jawan tem nüngtem nung asemtepba sentong ka ayongzüktsü.
“‘BSF half Marathon’ nung nisung ajaki shilem agitettsü. Nisung tongtibangtem aser Tripura nungi nüngtugu asayartemi iba asemtepba sentong nung shilem agitsü,” ta Ojha-i ashi.