BSF jawan indang ‘video’ prokshiba sülen bushisüngdangtsü tuyur

New Delhi, January 10 (Agencies) : Jammu & Kashmir nung mapa lemzükja aliba sepai kati parnok nem chiyungtsü tamajung agütsür ta ashiba video ka sayaba sülen anogo ka lir, Border Security Force-i jawan anema bushisüngdang ka asütsü ta osang metetdaktsüogo.
“Duty nung mobile phone amshibaji inyaktsü tuyuba sülen manidakba lir, anungji iba asoshi bushisüngdang asütsü,” ta Inspector General, BSF, DK Upadhyay-i ashi.
“Tej Bahadur-i tashi mangai inyak. Pa ya 2010 küma court-martial asütsü liasü. Ajisüaka, par kibongi mepishiba sülen pa nem tatok agütsü. Pai sangdongba onük ya onok asoishi kanga tongtipang lir aser pai tongloktsüba onüktem asoshi telangzüba tangbo magütsür” ta DK Upadhyay-isa shisem.
“Pa duty mapang kodaser mobile phone amshi ta asüba atema onoki bushisüngdang asütsü, kechiyong iba ya disciplinary guidelines anema lir” ta paisa ashi.
Facebook post ka nung Bahadur-i LoC nung aliba sepai nem chiyungtsü tamajung agütsüba indang ashi. Ajisüaka, Upadhyay-i ashiba agibo, “DIG jenjang nung aliba ketdangsertemi sepai tesep semdangdang chiyungtsü tamajung agütsüba osang mecha mangazük.”
“Chiyungtsü tachitsüji tajung ta ni meshitettsü saka jawan temi parnok nem chiyungtsü tamajung agütsür ta onok dang khen dang shia mali. Talisa, asükwa mapang, temang nung tzü ajema akümdangbo chiyungtsü tachitsü tajung-majung mechiteter” ta BSF Inspector General-isa ashi.
BSF jawan indang video kanga bulua prokshiba sülen Union Home Minister, Rajnath Singh-i iba onük atema bushisüngdang asütsü tetuyuba agütsüogo.
“BSF jawan-i timtem lemsatepba video ji reprangogo. Iba asoshi tangsa BSF nungi osang metetpelatsü ni HS (Home Secretary) dang shiogo” ta Rajnath-i yasüng Twitter ajanga metetdaktsü.
Ano külen, Minister of State (Home) Kiren Rijiju-ia defence forces nung metokmeperitem asoshi mapa inyaktsü ta nangzükogo.
“Security Forces tem indang timtem asoshi yariteptsübaji onok atema tongtipangtiba mapatem rongnung dena lir. tim masüba kar lira, iba asoshi akangakanga inyaktsü” ta Rijiju-i osangbener dang ashi.
BSF jawan Tej Bahadur-i sayuba vido nungji, “tsüngsang-mopung jungaka mesüra mejungaka, sepaitem anogoshia ghonda 11 tashi mapa inyakdaktsür saka onok kanga mejungi amshir” ta shia lir.
Tej Bahadur-isa parnok nem agütsüba chiyungtsü indang noksatem sayua lir.