BSF puri nashi chang shibelener ana apu

Shillong, June 6 (Agencies): BSF puri East Khasi hills nung international aartsü anasa India nunger nashi chang shibelener ana nashi ana bener puogo. Nashi ya Alto gari ka nung bener lia apu. Shibelensang ana ya Sonwell (17 ) aser Jewellson Kharwan ( 18 ) ta jngjaogo. Tenaprongla ya Meghalaya nung alir. BSF puri Alto gari den tena ket nungi India nunger sim card inoker phone ana aser India nunger sen 4380 ta ngutetogo.
BSF puri Bangladesh-i ozüng alema nashi chang shibelenba meita ao tenzükba sülen taoba itatem nung nashi chang nung sen jenjang ajungketogo. BSF puri maneni nashi chang shibelenertem aputsü asoshi inyakdar. Border Security Force-i Indo-Bangladesh arrtsü nung ozüng alema inyakba maparentem nokdangtsü asoshi meita aoba sentongtem tali akangshiogo.
Tanga tatalokba ka nung BSF sepai temi west khasi hills nung Bangladesh nungi India-i nashi 19 shibelenya lia puogo. Ajisüaka arem aser tamang dak jenoker shibelenertem jena oadok. Shibelenertemi tasa balala asaa shibelenba mapa inyaktsü asoshi meranger saka iba amala tasa balala nem mashiokdaktsütsü asoshi BSF sepaitem kanga junga training agir lir.
Maneni shibelenertem aser parnoki apuba nashitem ozüng agi melaba ama obendangtsü asoshi ketdangsertem nem bendanga agütsüogo.