BSF puri nashi chang shibelener oya aliba apu

Shillong, October 27 (Agencies): Meghalaya nung Indo-Bangladesh arrtsülen nashi chang shibelenba khen atema anener aliba maneni asendenshir tenzükogo.
Tawa East Khasi Hills district kübok Umsyiem nung amenoker aliba BSF sepaitemi sen lakh 2 dak tali alang nashi chang 13 puogo. International arrtsülen temulung malemtsüsa inyaksangshi reprangtetba sülen Special operation team ka iba tesemi aritepa ao. Ajisüaka tsüngsang majungba aser arem dak jenoker shibelenertem parnoki bena aliba osettsüt tem ajak toktsür jena oadok. Kasa mapang nung October 25 aser 26 tsüngda nung anti-cattle smuggling operation ka East Khasi Hills Distt kübok Muktapur tesem nung agia liasü, aser iba mapang nung sepaitemi nashi chang 16 apu.
Maneni East Khasi Hills kübok Kasinda tesem nung amendaker aliba BSF sepaitemi sen lakh 2 shi alang nashi chang 13 puogo. Kasaji East Khasi Hills district nung Shella tesem nung amendaker aliba BSF sepaitemia Tata Pickup gari ka nung nashi chang shibelener oya lia pua shibelenertem sentong raksatsüogo.
“BSF puri arrtsü nung shibelenba maparen nokdangtsü asoshi tasa aika asaa inyakdar,” ta BSF nung ketdangser kati ashi.
Shibelener oya aliba nashi chang aser osettsüt tem ajak iba dak sendakba department nem jenjang tapet agitsü asoshi agütsüogo.