BSI ajanga Laishiba oshi 142 nung meyipa lir

Dimapur, June 27 (TYO) : India nung Laishiba meyipa menünger telok tulutibaji Bible Society of India (BSI) telok ya lir aser tang tashi nung parnok ajanga tejen aser tasen Laishiba ajunga oshi 72 nung meyipa lir aser tasen lai kisüng oshi 70 nung meyipa lir ta tanü yangi iba osangzüluri Bible Society of India nung tir Rev.Dr.PNS Chandra Bose aser tongti zülur Rev.Dr.M.Mani Chacko na den jembidang tenati metetdaktsü.
Tenatisa ashiba agi, ano tang oshi 70 nung Laishiba meyipdagi. BSI nükjidongji India nung jembiba oshi ajunga nung pei oshi agi Laishiba meyipa menünger tongtsütsübaji lir. ” Linük nung nisung ajaki pei oshi nung Tsüngrem o azüngtsüsa BSI ajanga inyaker,” ta Chandra Bose-i metetdaktsü.
Tanü Hombar nü BSI lenirtem Nagaland nung aruagi senden lia amongba tenüng nung parnok nem aküm agüja ayongzükba sentong ka nung BSI tongti ketdangpurtemi jembidang, Nagaland nung amangba purtemi Laishiba oshi tapu balala nung menünga nübortem nem züngdaktsütsü tejangraba aser tangatetba nung yaritepba asoshi pelaba metetdaktsü.
Iba sentong nungsa BSI tir Chandra Bose-i jembidang, ” asenoki kodang sarasademdir asenoki Tsüngrem den jembir aser kodang asenoki Laishiba züngdir, idangji Tsüngremi asenok den jembir, anungji anogo shia Lashiba azüngba ajanga Tsüngrem nem asenok den jembidaktsütsüla,” ta metetdaktsü.
Iba sentong nung Nagaland Baptist Church Council (NBCC) tongti zülur, Rev.Dr.Zelhou Keyho-i Tsüngrem i jembidang, Laishiba ya kaket ajak dang temeimtiba aser tashi tulutiba kechiyong iba yagi taküm agütsür kechiyong ibai taküm o ta metetdaktsü. Asenok aikati Lashiba ya magic kaket amai bilema timtem mapang mesüra takok ngunüdang dang ammiter, saka iba taküm o dakji mamang tashi laishiba jagi asen taküm nung mapa meinyaktsü ta Rev.Dr.Z.Keyho-isa metetdaktsü.
Iba sentong nungsa Nagaland Chamber Choir-i ken tajung ana aten aser Chang, Konyak aser Yimchungru kintem nungi sobaliba yartsüngsang sayua liasü.
Iba sentong tenzüka Dimapur Ao Baptist Arogo sannüker Rev.Dr.N.Tzüdiri sarasadem aser NCRC nung tir Rev.Dr.N.Paphino-i sarasadema sentong tembang.Iba sentong nung Wt.Kakheli Inato menden liasü aser Wt.Bendangla Aoi Laishiba azüng aser ano tongtibang nisungtem nem Sr. Auxiliary Secretary, Rev.Dr.Z.K.Rochill ajanga nüngo sempet agütsü.
Asenok pei oshi nung jungjunga meyiper Laishiba sen jenjang dalang agi anguba ya BSI ajanga inyakba ajanga lir.