BSNL amshirtemi Tata Communications ajanga tanga lima nung Wi-Fi amshitettsü

New Delhi, January 15 (Agencies): Sorkar meyong BSNL aser Tata Communications sentepa alima balala nung Wi-Fi hotspot 44 million amenoktsü aser iba amshitsü atema sen 999 nungi tema agi inoka amshitettsü.
“International level nung Wi-Fi amshitsü asoshi India indang BSNL-i iba sentong mezüng tenzüker. Costumer tem linük balala sema jajadang iba high-speed data amshitettsü asoshi onoki Tata Communications den longjemer iba sentong tasen tenzüktsü. Sen jenjang agüja aliba yagi iba unlimited data item hotspots nung amshitettsü,” ta BSNL Chairman aser Managing Director, Anupam Shrivastava-i metetdaktsü.
Costumer temi iba Wi-Fi plan ya BSNL indang mobile application nung activate sütettsü. Iba plan jenjang yamai alitsü: Anogo asem atema sen 999, anogo 15 atema sen 1,599, anogo 30 atema sen 1,999 agi angutsü.
Iba application nung Wi-Fi hotspot koba tesem nung ali, ajia sayutsü.
“BSNL mobile amshirtemi bill aika adoktsü atema shisabulu melii alima tesem ajak nung Wi-Fi amshitettsü aser kecha telatet mekai Internet amshitettsü,” ta Shrivastava-i maneni ashi.
Costumer temi iba plan activate sür Wi-Fi amshitsü asoshi One-Time Password menüngdaktsü. BSNL ya India nung mobile service agütsür tulutiba rongnung pezübuba jenjang nung lir aser wirelines broadband service agütsür tulutiba lir.