BSNL-i arrtsülen parnok network tashi itshitsü

Agartala, July 17 (Agencies): Bangladesh, Bhutan, aser Myanmar arrtsülen parnok network tajungba aser tashi taitba akümtsü asoshi BSNL-i mobile phone indong tasen aika metongtsü, ta Hokolbar nü ketdangsertemi ashi.
“Onoki Bangladesh, Bhutan aser Myanmar arrtsülen BTS (Base Tower Stations) lapoktsü asoshi maparen tenzüka yutsüogo aser ibaji ajanga arrtsülen mobile phone atema network tajungba küma tesentaktep tali tashi itshitsü,” ta Bharat Sanchar Nigam Limited (BSNL) nung ketdangser kati ashi.
“Memetetba nisung tamajungeri network signal tailen mamshitsü meji nung International arrtsülen kilometre 10 telungtet nung BTS mamenoktsü, ta lateta aliba Union home ministry-i iba telatetba tawa ageintsüogo,” ta ketdangser jagi IANS osang ajanga ashi.
BTS ya Border Security Force (BSF) aliba border outposts (BOP) tesem tem ajak nung amenoktsü, ta ketdangser jagisa ashi.
Paisa ashiba agi, iba maparen ajanga BSNL-i international arrtsülen BTS ajak agi 450 tashi amenoktsü sentong lir aser ibaji ajanga mobile phone ajanga sentaktepba nung timtem aliba agientsü.
Arrtsülen iba maparen takok ngua inyaktettsü asoshi Power Grid Corporation of India Ltd. (PGCIL) ajanga BSNL nem technical teyari agütsütsü.
Northeast India nunga PGCIL-i ali telung nung cable network tulu sentaktepa lir aser BSNL-i iba network ji amshia linük nung state yimtitem aser tenemlen aliba yimtitem na sendakteptsü.