BSNL-i roaming atema Vodafone den tezüngzüktep agiogo

Delhi, Sept. 11 (Agencies): India nung telecom service agütsür tulutiba rongnung ka ta züngshiba, Vodafone aser sorkar meyong telecom service, BSNL na tanü, Deobarnü parnok longjemer linük nung network tashi itdakja 2G intra-circle roaming tenzüktsü atema tezüngzüktep ka nung sign sütepogo.
Tena longjemba ajanga network tesentaktep tajungba küma customer ajangzüktsü.
Iba tezüngzüktep ayuba ajanga yimtsüngtem nung Vodafone 2G network tali renloktsü aser jila o yimtitem nung BSNL network renloktsü. Linük nung Vodafone India meyong towers 137,000 lir aser BSNL indang towers 114,000 lir.
Tezüngzüktep agiba sentong nung BSNL MD, Anupam Srivastatav-i, “Vodafone den longjemba ajanga jila aser yimtitem nung BSNL network tajungba akümtsü aser ibaji ajanga customer temi service tajung angutsü. Onoki linük rangben nung onok network tuluba akümtsü atema tanga telecom service provider tem den infrastructure lemsateptsü,” ta metetdaktsü.
Vodafone India nung MD aser CEO, Sunil Sodd-i, “BSNL den longjemba ajanga yimtsüngtem nung onok network tali renloktsü,” ta ashi.
Vodafone India ya noklang nung noklang Vodafone Group Plc. indang subsidiary lir aser iba service amshir customer million 199 lir. Customer ajak rongnung million 107 bo jila aser yimtitem nungi lir aser onoki m-Women, m-Agriculture, m-Education aser Disaster Relief tsütsü kanga bendanga agüja inyaker, ta pai ashi.