BSNL-i Wi-Fi Hotspots 25,000 amenoktsü

June 10, 2017 (Agencies): State meyong Bharat Sanchar Nigam Limited (BSNL)-i parnok indang rural exchange tem nung ita 6 tsüngda nung Wi-Fi hotspots 25,000 amenoktsü asoshi hokolbarnü Universal Service Obligation Fund (USOF) den tezüngzüktepba ka yangluogo.
Iba tezüngzüktepba ya Communications Minister Manoj Sinha matsüngdang züngzüktepogo.
Wi-Fi hotspots 25,000 ya USO fund nungi sorakari teyari agüja amenoktsü. Iba project nung sen 940 crore indoktsü, ta BSNL-i metetdaktsü.
“Iba sentong amener mezüng küm USOF-i noklang nung noklang OPEX support agutsütsü iba sülen tanabuba küm shilem 75 agütsütsü aser tasembuba küm BSNL nem shilem 50 bo achaayangtsü asoshi agütsütsü,” ta kasa osang ajanga metetdaktsü.
“Iba project kübok mezüngbo rural exchange ajak nung Wi-Fi Acess Point kaka amenoktsü,” ta maneni shisem.
BSNL market share indang jembidang Minister-i ashiba agi, “Yaküm nungi BSNL market share shilem 0.30 agi timba kümogo. BSNL indang shilem 9.05 nungi 9.35 kümogo. Financial/economic tsütsü nungi asadangba nung iba küm taoba küm dang nungi timba asütsü.”
Yimdak yimtsüngtem nung internet connectivity agütsütsü asoshi sorkar-i bendanga agüja inyakba minister-i lemsatep.
“Taoba anogo isheka nung yimya melenshiogo. Mezüngbuba quarter nungi tanabuba quarter tashi nung data amshiba shilem 60 agi timba kümogo aser tasembuba quarter nung tanabuba quarter dang nungi shilem 3.5 agi timba kümogo. Aji asünung iba project ya tembanga inyaktsü asoshi nüngdaker aser iba ajanga yimdak yimtsüngtem digital tsütsü bendanga aliba samadaktsütsü. Sorkari iba dak sendakba nung jenjang ka agiogo aser service agütsütsü asoshi Wi-Fi Hotspots 25,000 anemoktsü atema BSNL nem bendanga agütsüogo,” ta Minster-i osangbenertemdang ashi.
BSNL CMD Anupam Shrivastava-i ashiba agi BSNL-i maparen inyak tenzükogo aser ita 6 nungi 8 tsüngda nungbo iba project tembanga service agütsü.
“Optical fibres 93,000 shi mesangogo aser shilem mezüngbuba June 30 tashi nungbo renemtsü. Mezüngbuba shilem nung nükjidongji lakh ka lir aser iba sülen lakh 2.5 nükjidong yua alibaji 2018 december tashi nungbo tembangtsü,” ta minister-i ashi.