BSNL-i Wi-Fi tesem 40,000 atema Rs 6,000 crore enoktsü

New Delhi, July 30 (Agencies): Bharat Sanchar Nigam Ltd (BSNL)-i tang nung shir küm asem tashi nung linük sema Wi-Fi hotspot 40,000 amenoktsü asoshi sen crore 6,000 enoktsü, ta BSNL nung chairman-cum-managing director Anupam Shrivastava-i metetdaktsüogo.

“Tang nungi shir küm asem tashi nungbo WiFi hotspot 40,000 tashi linük sema amenoktsü onok nükjidong lir. Onoki iba maparen dak sentakba nung 2015-16 atema tesem 250 shimteta lir aser hotspot 2,500 amenoktsü tebilemba lir,” ta pai ashi.

Tang tashi nung BSNL-i linük nung WiFi hotspot 70-75 tashi amenoktsü mapa tenzükogo saka ano junga merenemi lir. Parnoki mapa timba ka atema nija company dena anisemer inyaker.

“Onoki jungjunga asadangba mapang BSNL nung 4G licence maliba metet aser ibaji alitsü asoshi sen-a mali. Saka tarutsü atema 4G ji kanga nüngdak ta onoki metet. Onok meyong landline ya onok asoshi tashi tulutiba ta meteta aru,” ta Shrivastava-isa ashi.

“Linük nung onok meyong optical fibre network kilometre 700,000 shi lir. Anungji khen bilemtsü agibo iba ya dang junga amshi tajungba asütsü amai, saka 4G tensa nung WiFi technology nüngdaker, anungji onoki WiFi atema maparen tenzükogo,” ta paisa shisem.

“Onoki iba maparen jangra akümba sülen nija company tem dang WiFi hotspot amenoka küm pongu asoshi anepalutsü aser ‘sales & marketing’ tsütsü-a acha ayangtsü tetuyuba agutsüogo,” ta pai ashi.

WiFi hotspot pongu amenoktsü atema sen lakh 10 enoktsüsa akümer.

WiFi maparen nung inyakyim tejangja tekaratiba nung metetdaktsütsü saka ibaji atema onoki bilemba ka tama atongtsüla. Onoki tesem 250 nung iba maparen tembangba den külemi onoki enokba sen monokteta tajangzük arumesotsü,” ta paisa ashi.

BSNL-i tarutsü nung ano koba tashi ka inyaktettsü ta asüngdangba mapang pai, küm ana asem tsüngda nungbo yimtak yimtsüng nung aliba exchange temjia next generation network (NGN) akümtsü, ta langzüa liasü.