BSP-i GST pusemtsü: Mayawati

New Delhi, November 30 (Agencies): Hombar nü BSP tongti lenir, Mayawati-i, lar party-i Parliament nung GST bill pusemtsü, ta sangdongogo.

Ajisüaka linük nung akhümtsübutep maliba den communalism aser tzüng-ozüng mali, ta shia lai Haryana nung Dalit tanur ana tepsetba dak sentakba nung Minister V K Singh-i jembiba o atema pa nem temerenshi agütsütsüla, ta takhangba agütsüogo.

Rajya Sabha nung ‘Commitment to the Constitution’ onük nung o toktepba mapang lai Scheduled Castes, OBCs aser minority tem, talisa Muslim nungeri ajangshiba tebilemtsü süoka jembiogo.

Haryana nung Dalit tanur ana tepsetba dak sentakba nung Minister Singh-i tanurtemji azü den medemdanga jembiba anema Mayawati-i, “Minister ji Council of Ministers nungi agientsüla aser tepouktaki yoktsüla, kechiyong item ama nisungji Parliament nung masü saka tepouktak alitsü tetemsü,” ta ashi.

Ita ishika tejaklen Uttar Pradesh, Dadri nung tanur ana mi agi rongseta südaktsüba tatalokba densema tatalokba balala nung ajemdaker lai sorkar aitsüba den külemi Lok Sabha nung Ato kilonser Narendra Modi-i sangdong agütsüba aija sorkar dang, linük Temzüng junga benoktsü atema jembir no (?) ta tasüngdangba aika kaogo.

BSP tongti Mayawati-isa Modi dang, nüburtem jashitsüsa o mekümdangi jembir par minister tem aser party nung külem inyakertem nem nai temerenshi agütsütetdi ma (?), ta asüngdang.

Ajisüaka lai GST bill pusemtsü ta sangdongogo. GST bill ya taoba Parliament senden nung Rajya Sabha nung magizükteti lir.

“Ner sorkari GST Bill ya linük atema ta tejangja melung lemteta lira, ibaji ajanga rongsenkettsüng jenjang melenshitsü, BSP-i pusemer. Ozü party-i iba bill Parliament nung pusemer,” ta lai ashi.