BSP-i UP election atema candidates ajak sangdongogo

Lucknow, January 08 (Agencies): Deobarnü Bahujan Samaj Party (BSP)-i, Uttar Pradesh nung Assembly menden 101 atema candidates tenüng sangdongogo.
Party-i ajak agi candidate 401 sangdongogo.
Sonebhdra nung tanüngba menden ana atema candidates ji general asü ST atema wazüka yutsür’ar iba atema telemtetba agiba sülenang sangdongtsü, ta party osang ka ajanga metetdaktsü.
BSP-i Dalits nem ticket 87, Muslim nunger nem ticket 97 aser OBCs nem ticket 106 lemtsüogo, ta BSP tongti, Mayawati-i metetdaktsü.
Uttar Pradesh nung vote agutsütsüpur shilem 20 bo Muslim nunger lir; 2012 election nung parnoki SP yaria liasü.
Ajisüaka tangbo parnoki Samajwadi Party (SP) tensa repranga atadar, kechiyong SP nung Chief Minister Akhilesh Yadav’er telok aser tebu, Mulayam Singh-i aniba telok tsüngda mepetmesü adoka lir.
Tesüiba ita ishika tsüngda Samajwadi Party nung telok ana tsüngda mepetmesü adoka ibaji bentettsü atema senden aiben menogo, saka telemtetba tajung ka dangi marur.
SP nung mangatettep aliba ajanga BSP ajangzüktsü südi ta bilemer.