BSP MP Brajesh Pathak BJP nung denogo

New Delhi, August 22 (Agencies) : Mongpu ana tashi Bahujan Samaj Party (BSP) MP, Brajesh Pathak Hombarnü BJP den denogo.
Agra nung Mayawati nübuyim sentong nung adenba sülen pai, Uttar Pradesh nung BJP-i terenlok mapa inyakba nung temulung alemer, ta ashi.
Pathak BJP nung züngsem aküm dang party Tir Amit Shah aser Union minister Mahesh Sharma nata liasü aser Hardoi-Unnao tesem nung pa tongshi tajung ka asütsü ta ashi. UP nung Assembly election sangküm, 2017 küm akatsü.
Sharma-i, Pathak party nung densemba ajanga Brahmin tem vote atsüa aruba nung yaritsü, ta ashi.
Pathak BJP headquarter nung oa züngsem akümtsü tenangzükba agiba mapang BSP-i pa sentong angateta party nungi züngtokogo.
BSP lenir Swami Prasad Maurya den ano tangar kar BJP nung oa züklok dangbo Mayawati aija liasü, ajisüaka Pathak-ibo la maitsü, saka state nung teraksa, bendanga amshiba aser ozüng alema benshiba agi sünga lir, ta ashi.
“Ni ano mapang tatsüka tanga menu nungbo akoksatsü ta shisatet. Ato Kilonser Modi aser Amit Shah na inyakyim agiang Uttar Pradesh kümzüktettsü,” ta Pathak-i osangbenertem dang ashi.
Yashi ang na BSP nübuyim sentong nung dener tanü BJP nung züngsem akümer na ? ta asüngdangdang pai, “Ni party nung ali tashibo kü teinyaktsü tim inyaktsü nüngdak,” ta langzüa liasü.
Pathak-i, 2007 Assembly election nung BSP atema ni Brahmin tem indang vote kar atsüa arutetogo, ajisüaka parnok party agi temulung masür,” ta ashi.
BJP-i tesüiba mapang Unnao Lok Sabha MP aser tang Rajya Sabha member, Pathak-i, congress teloki aginüa aliba Brahmin tem indang vote BJP atema anir arutettsü ta teimla tulu lir.