Buckingham Palace nung nisung kati lendong agütsü

London, August 26 (Agencies): London nung aliba Buckingham Palace nung police ketdangsertem dak nisung kati kotari agi atsüngba ajanga Scotland Yard temi kiralongra bushisüngdang tenzükogo.
Tangar dak kanga mejungi yirutsüba ken o nung temolung melemi arishi küm 26 tain tebur ka mezüng apu aser police dak mapa tamajung inyaker nisung ya United Kingdom indang Terrorism Act 2000 temzüng kübok tanaben apu, ta Metropolitan Police temi Honibarnü ashi.
“20:35 ako meta Spur Road, SW1A anasa aliba Mall nung nisung ka gari nung arua ‘restricted area’ nung police gari anasa anen. Iba nisungba gari nung kotari tulu ka Mall nung aliba police temi ngua pa apu. Pa aputsü merangba mapang police tebur ana teka yiru,” ta Metropolitan Police ajanga ashi.
Police yirur anaprong mozüki nung anepalur yok.
Temolung malemsang ya London hospital nung anir oa yirua aliba anepalur central London police station-i asüngdangya asütsü anir ao.
“Police temi pua alisang den iba tesem nung aliba nüburtemi o jembiba mali aser yiruba osang mali,” ta Met Police ajanga ashi.
Iba lendong adokba mapang Queen Elizabeth II aser lar kinungertem Buckingham Palace nung meliasü.
Arishi küm 91 tain chubatsür ya Scotland nung aliba Balmoral Castle nung lir aser lar kinüngertem ya tang UK nung summer holiday aliba ajanga tesem balala nung oa amungba mapang lir.
Aji süaka London nung chubatsür aliba ki nung inyakyim ajak akhi ama alitsü, ta iba chuba ki indang odongtar-i ashi.
Tenük kuli alir osang ajanga ashiba agi, iba nisungba indang gari nung noklang nok ka angu.
Police temi angudang iba temolung malemsang indang gari ya ozüng ajanga nokdangba tesem nung anen.
Iba tesem ya mapang talangka melie police aser tanükertemi müketbang aser raliwalirtem ya iba tesem nungi anir ao.
Tawa kiralongrar ajanga lendong agütsüba sülen Europe ya saksalema lir.
Barcelona nung kanga nüngtugu Las Ramblas tesem nung kiralongrartemi taoba Bodhbarnü lendong agüja nusung 14 tepset.
Honibar aonunga Brussels nung nisung kati nok bener arua mitkartem dak lendong agütsü.
Iba nisungba ya idangjisa khaset aser mitkar ana yiru.
2017 küm kisüng nunga Britain nung kiralongrartemi lendong aiben agüja arudagi.
March nunga kiralongrar kati gari ka anir arua London nung aliba Westminster Bridge nung senzüsempongertem dak atsük, aser iba mapang nisung pezü asü.
Khalid Masood-ia Parliament telungi ia police ketdangser ka dak kotari agi atsüng. Iba sülen pa ya police temi khaset.
May ita Manchester nung Ariana Grande indang concert nung kiralongrar mapa inyaka suicide bomb pokdaktsür Salman Ramadan Abedi-i bomb ka pokdakja nisung 23 pokset aser 250 yirutsü.
June ita London Bridge nung kiralongrar asem-i gari anir arua senzüsemponger dak tsüka kotari agi nisungtem dak aset. Iba mapang nisung ti asü aser kiralongrar asem ya police temi khaset.