Buddhists nunger 1,300 Mizorami aru

Aizawl December 4 (Agencies): India sorkari parnoki ozüng yangluba raksaa Myanmar kübok Rakhine tesem nungi tribal Buddhist refugees parnok 1,300 Mizoram-i aitsü asoshi temelaba agütsüogo. Parnok ya Myanmar army aser Arakan Army na tsüngda rara adokba ajanga parnok ki toktsür jena aru.
Iba telemtetba ya Union Home Ministry ajanga northeastern state tem dang Rohingya nungertem India litsü adena maitdaktsütsü asoshi meita alitsü atema tetuyuba agütsüba sülen ita ka shi lir ataloker.
Refugee lokti tasenba ya Chin nungertem aser Myanmar nung tanga kin balala kar nungi lir, aser parnok Lawngtlai district kübok yimtsüng pezü nung jenoka lir.
Osang ka ajanga ashiba agi, Mizoram sorkar aser ketdangsertem, Laitlang, Dumzautlang, Hmawngbuchhuah aser Zochachhuah yimdaklirtem o refugee tem tsüngda mangatettep adoktsüba tensa ka nung aliba azüoktsü asoshi kanga timtemdar.
State administration sangdong ka ajanga ashiba agi, refugee tem ya humanitarian ground nung anepaludar kechiyong parnok ya kidang timtem tekangshi aliba tensa ka nungi jena aruba lir.
“Refugee tem Mizorami arur anogo trok shi lir. Parnok ya Lawngtlai district kübok yimtsüng pezü nung jenoka lir aser parnok ya shelter homes, Buddhist homes, temples aser tanga tesem tem nung anenzükdakja lir,” ta Lawngtlai, Deputy Commissioner T. Arun-i ashi.
Pai ashiba agi iba amala tensa ka nung security tsütsü timtem adoktsü ana nung dang lir.
“Okok atema ozüng ana dang lir- kaji national security dak sendakba nung aser kaji humanitarian assistance. Humanitarian temzüng kobok onoki parnok nem chiyongtsü agütsür, kechiyong onoki parnok yaseta mesüdaktsüner. Maneni iba amala tensa ka nung tashidak balala adoka prokshiba nokdangtsübaji onok khuret lir,” ta Arun-i ashi.
Onoki Police, health workers aser doctors talila iba tesemi yokogo aser parnok ya refugee tem meita alitsüba atema dang masü saka parnok health condition dena reprangshitsüba atema lir.
“Refugee tem anenzüka aliba yimtsüng shia nung nütsüng yongsük 200 nungi 400 tashi dang lir, aser nisung aika item yimtsüngtemi senoka aitba ya tebilemtsü tulu lir,” ta Arun-isa ashi.
Mizoram police tekolakbai ashiba agi, parnoki refugee tem aruba ya tangsa tangbo security tsütsü timtema amaibo mezüngshir, aser Myanmar nung tensa tajungba akümba sülen parnok meyipa yoktsüba atema atatar.