Budget ajak benoktsüsa sorkar dak temeden mali: Congress

New Delhi, January 24 (Agencies): Tanü Congress Party-i, Modi sorkari Parliament nung budget ajak benoktsü merangra parnoki Parliament kilung aser kima naprong longkak aittsü, kechiyong ibaji ajanga temzüng aser Parliamentary telatetbatem anema inyaktsü, ta metetdaktsü.
February 1, 2019 nü Centre sorkari interim budget benoktsü lia tanü Congress Party otongdar, Manish Tewari-i, financial year 2019-20 nung Modi sorkar kümsük anogo 56 dang anünga lir, anungji koma ser parnoki anogo 365 (küm ka) atema budget benoktettsü? ta asüngdang.
“NDA-BJP sorkari budget ajak benoktsü merangra ibaji ajanga küm 70 dak tema benshia aruba parliamentary telatetbatem anema inyaker asütsü,” ta pai ashi.
Tanü New Delhi nung osangbenertem den jembidang Congress lenir, Tewari-i, “Küm 5 tsüngda trokbenbuba budget ajak benoktsüsa Modi sorkar dak temeden mali,” ta metetdaktsü.
Taoba mapang Union Minister, Manish Tewari-i, “Küm pongu tsüngda trokben tashi budget ajak benoktsüsa NDA-BJP sorkar dak temeden mali. 2014 küm May ita nung parnoki sorkar tentetba sülen parnoki 2014-15, 2015-16, 2016-17, 2017-18 aser 2018-19 kümtem atema budget ajak benokogo,” ta metetdaktsü.
Tang Modi-i aniba Centre sorkar kümsük ya taküm May 26 nü tembangtsü, ta shia Tewari-i, “Koma ser sorkari anogo 365 atema budget benoktsü sayangteter?” ta asüngdang.
“Tesüiba küm pongu tsüngda rongsenkettsüng junga ketdang mesütba mimbangtsü atema parnoki linük temzüng aser Parliamentary telatetbatem alema inyaktsü meranger,” ta pai ashi.
Modi sorkari budget ajak benoktsü merangra Congress-i Parliament kilung aser kima naprongla nung longkak sashia aittsü, ta paisa metetdaktsü.