Budget ajanga aluyimer aser sensakertem anisüngzüktsü: Shah

New Delhi, February 01 (Agencies): Union Budget 2019-20 tenüngsanga BJP National Tir, Amit Shah-i, iba budget ajanga linük nung nübur ajak anisüngzüktsü, ta ashi.
Paisa, Ato kilonser Modi sorkari linük nung lanurtem, aluyimertem aser sensakertem atema inyaker, ta ashi.
Tanü Lok Sabha nung Budget senden nung Finance Minister, Piyush Goyal-i interim Budget 2019-20 benokba sülen Shah-i iba o ya jembi.
New Delhi nung osangbenertem den jembidang Shah-i, iba budget ajanga linük aintsü, mapa adokdaktsütsü aser middle class, aluyimertem aser aayanger sensakertem anisüngzüktsü, ta ashi.
BJP Tirisa, Finance Minister Piyush Goyal-i income saru ajemtsü atema sangdongba ya puti otsüsütsüsa ka lir, iba ya ajanga middle class pur saru nung anisüngzükba dang masü saka parnoki linük terenlok nung shilem tajungba agitettsü, ta ashi.
Paisa budget nung sangdongba onüktem metetdakja, aluyimertem income anasü agi timba akumtsü, ta ashi.
Sorkari defence sector atema sen 3 lakh crore sangdongba atema tenüngsanga Amit Shah-i, tang tashi nungbo ibaji timtiba lir; BJP-i aniba NDA sorkar atema linük security ji tongtibangtiba, ta ashi.
Shah-isa arishi küm 60 dak temapur sensaker mapa inyakertem crore 10 dak tema nem ita shia pension sen 3000 agutsütsü atema sangdongba, fishery department temeja akumtsü aser tetsürtem atema sangdongba schemes asoshi tenüngsang agutsü.