Budget nung saru, sen teintokba aser apuba liromedemtsüla: Sinha

New Delhi, February 20 (Agencies): Parliament nung Budget senden tenzüktsü mapang ana nung lia Honibarnü Minister of State for Finance, Jayant Sinha-i, sorkari anguba saru, sen teintokba aser iba nungjagi market nung sen kwi rendaktsüteter, item ajakji liromedemtsü nüngdak, ta ashi.
“Sorkari ajangshiba tebilemtsütemji angatettsü nüngdak. Onoki saru tali sarutsüla asü, sen tajemba intoktsüla asü mesüra tali aputsüla (?) Itemji kanga kümdanga liromedemtsü nüngdak,” ta tanü Sinha-i twitter ajanga ashi.
Paisa twitter page nung, 2015-16 küm sorkari sen lakh crore 17.8 intokba, saru indang receipt sen lakh crore 12.2 aser sentsüh aotsü atema sen lakh crore 5.6 apuba sayu.
“Asadangba: Küm shia sen 100 aitba kibong kati sen 146 intoker, koba ajanga kümshia sen 46 aputsüsa akumer,” ta Sinha-i ashi.
Paisa, “Tasüngdangba: Onoki sen tali aazüktsüla (saru) asü, sen tajemba intoktsüla asü mesüra sen tali aputsüla (?)” ta ashi.
Tamalen Youtube post ka ajanga pai, “Taruba senotsü sentong (budget) nung tongtibang onüktemji sensakertem ajungkettsü, aluyimertem jenjang tajungba akumtsü aser lanurtem nem mapa agütsütsü onüktem asütsü, aser ibaji February 29 nü Parliament Upper House, Lok Sabha nung benoktsü, ta metetdakja liasü.
Hokolbarnüa pai twitter ajanga, tan aliba sorkari osettsüset nung jenjang atuba azüoktetogo, ta ashi.
“NDA sorkari osettsüset nung jenjang atuba azüoktetogo,” ta pai ashi.