Budget senden dak sendakba nung LS Speaker-i senden ayonger

New Delhi, Aenjeti (January) 27 Agencies): Parliament Budget Session tenzüktsü joko anogo ishika dang lia Küptoknü (Honibar) Lok Sabha Speaker, Sumitra Mahajan-i asüng yimtenren party balala nungi House lenirtem senden ka ayongzükogo.
Parliament Budget senden nung Centre sorkar aser Congress Party densema Opposition party tem tsüngda triple talaq bill onük densema onük aika nung o tokteptsüa akok.
Ano asüngsa Centre sorkari tanga senden ka ayongzüka lir, aser iba senden nung Ato kilonser, Narendra Modi den opposition lenirtemi tongtibang onüktem nung pei tebilemba lemsateptsü.
Budget senden mezüngbuba session ji Aenjeti (January) 29 aser Tsüklai (February) 9 tsüngda agitsü, aser iba mapang nungji sorkari Aenjeti 29 nung economic survey metetdaktsütsü, iba sülen Tsüklai 1, 2018 nü Union Budget benoktsü.
Budget senden tenzüka linük Tir, Ram Nath Kovind-i Lok Sabha aser Rajya Sabha külem senden nung züngsemtem den jembitsü.
Tir Kovind atemabo tang mezüngbuba Parliament nung jembir asütsü, anungji pai sorkari terenlok aser nüburtem nem tashi agütsütsü atema inyakba onük nung jembitsü imlar, ta ketdangsertem osang ka ajanga metetdaktsü.
2019 küm Lok Sabha election agitsü lia BJP-i aniba NDA sorkari tang tesüsa budget benoktsü, anungji election atema iba budget ya kanga tongtibang asütsü.
Osang angazükba agi, NDA sorkari linük nung sensakertem aser aluyimertem dak rangloker Union Finance Minister, Arun Jaitly-i budget benoktsü.