Budget senden Feb 23 & Union budget Feb 29 nü benoktsü

New Delhi, February 04 (Agencies): Parliament nung Budget senden February 23 nü nungi tenzüktsü; iba senden nung sorkar indang sen sentong tuluba benoka jembitsü aser general budget Feb 29 nü benoktsü.

Ajisüaka, taküm assembly election state pongu nung liaka Parliament senden anogo majemtsü aser recess period alitsü.

Union Home Minsiter Rajnath Singh leniba nung Cabinet Committee on Parliamentary Affairs senden ka amenba mapang item telemtetba agia liasü.

Cabinet Committee on Parliamentary Affairs (CCPA) senden amenba sülen osangbenertem den jembidang Parliamentary Affairs Minister Venkaiah Naidu-i, “Parliament budget senden February 23 nü nungi tenzüktsü. Rail Budget February 25 nü benoktsü, pre-budget economic survey February 26 nü benoktsü aser General budget February 29 nü benoktsü,” ta ashi.

“Budget senden mezüngbuba shilemji March 16 nü tembangtsü aser tanabuba shilemji April 25 nungi May 13 tashi akatsü,” ta paisa ashi.

“2011 küm, taoba sorkar-i state tem nung election aliba ajanga budget senden nung bill tem Standing Committees matsüngdang mebenoktsü lemteta liasü aser senden anogo ajemtsü takhangba liasü. Saka tanü sorkari recess period mapang nung bill temji standing committees matsüngdang benoktsü lemtetogo,” ta paisa ashi.

Minister of State for Parliamentary Affairs, Mukhtar Abbas Naqvi-i, tesüiba senden ana nung Congress aser tanga opposition party temi senden nung mepetmesü adokdaktsüba ajanga tongtibang bill tem nokdangba ama masü saka tan budget senden yabo junga katettsü sorkari tamang akar, ta ashi.

“Linük terenlok den sensakertem, lanurtem aser tanga loktitem tejakleni aotsüsa iba budget senden junga katettsü onoki imlar. Item onüktem nung yimtenren party kechaia terenlok menokdangtsü onoki imlar. Tesüiba senden ana amajok nung tembangba atema tanbo Congress-i shilem junga agitsü onoki imalr,” ta Naqvi-isa ashi.

“Iba senden ya junga katettsü atema onoki ajak den jembitsü meranger,” ta paisa shisem.

CCPA senden malidang sorkari party ajak senden ka ayonga liasü, aser iba senden nung opposition party temi, state pongu nung assembly election liaka Parliament Budget senden anogotem majemtsüla ta takhangba agüja liasü.

Senden nung JD-U lenir Sharad Yadav-i, “State kar nung election aliyonga budget senden anogo majemtsüla ta party balala tangatetba lir. Ajisüaka recess atema anogotemjibo sorkari lemtettsü party temi nungoktsür,” ta ashi.

CPI-M lenir, Sitaram Yechury-i, “Ratamata malitsü atema kümshia sorkari Parliament senden anogotem indang calendar ka adoktsüla. Iba sülen Election Commission-i Parliament anogotem apir election agitsü anogotemji shimtsü. Ato kilonseria senden anogotemji meteta bendangleni maotsü saka senden nung alitsü,” ta ashi.

Sorkari ayongba party ajak senden nung Congress nungi Ghulam Nabi Azad, Anand Sharma aser Deepinder Hooda of Congress, JD(U) nungi Yadav aser K C Tyagi na, Samajwadi Party nungi Ram Gopal Yadav aser CPI(M) nungi Yechury nungeri shilem agia jembi.

Naidu-i, Budget senden 31 alitsü, ta metetdaktsü.

Taküm mezüng senden tenzüknü, February 23 nü Tir, Pranab Mukherjee-i Rajya Sabha aser Lok Sabha külem senden nung jembitsü.

Naidu-isa, Budget senden ya Hombar, February 22 nü tenzüktsü sentong liasü, ajisüaka Ravidas Jayanti aliba ajanga February 23 nungi ang tenzüktsü lemtet, ta shisem.