Buffon-i iba season tatem nung Juventus toktsütsü

Turin, Monupii (May) 17 (Agencies): Juventus goalkeeper Gianluigi Buffon, iba club nung küm 17 tashi asayar iba season tembangba sülen Juventus toktsütsüba sangdongogo, ajisüaka ajaki imlaa aliba ama pa asaya nungi anentsübabo mesangdong.
Arishiküm 40 tain Buffon-i Juventus captain shilem agia Serie A title tenetben tashi atonga takoki par telok aniogo aser iba den iba season densema Italian Cup pezüben atonga kokogo.
“Asaya takok nung tembangtsüba ya kanga tongtibang liasü,” ta osang bener dang Italy nungba yagi ashi.
“Ni Küptoknü tatembangsa Juventus nungi asayatsü,” ta paisa ashi.
Taoba Parma asayar ya Verona den Turin nung asayaba züngsem Serie A nung asaya 640 buba nung shilem agitsüba lir.
Buffon-i ashiba agi, pai mapang agia pa tarutsü indang telemtetba aginer.
“Ni kechi inyaktsü? Küptoknü ni asaya ka nung shilem agitsü aser ni ibaji dang jangjaa lir,” ta paisa ashi.
“Anogo 15 tejakdang ni asaya nungi anentsüba jangjar liasü, saka kanga dang jangratemtsü maongka kar ni agizük koba asayatsüba aser masayai achaayangtsüba densema lir. Pitch tema nung inyaktsüba rongnung (Juventus) tir (Andrea) Agnelli-i kanga dang jangratemtsü maongka ka agütsüogo.”
“Anogo ishika kanga junga shisadangba sülen taruba hopta ni telemtetba agitsü,” ta paisa ashi.
Osang ajanga ashiba agi, Liverpool, Real Madrid aser Paris Saint Germain densema Europe nung tongtibang club temi pa nem offer agütsüogo.
Buffon-i Italy team atema 176 ben asayaogo.